Rania R.a. Abushamala
08 Октомври 2025•Ажурирај: 08 Октомври 2025
ИСТАНБУЛ (АА) - Пратеникот на американскиот претседател Доналд Трамп за Блискиот Исток, Стив Виткоф, и зетот на Трамп, Џаред Кушнер, пристигнаа во Египет рано утринава за да се вклучат во преговорите за прекин на огнот во Газа, објавија американските медиуми, пренесува Анадолу.
„Пратеникот на претседателот Трамп, Стив Виткоф, и Џаред Кушнер пристигнаа во Шарм ел-Шеик утринава за да се вклучат во преговорите за договорот за ослободување на преостанатите заложници што ги држи Хамас и за завршување на војната во Газа, која сега надмина две години“, објави американскиот новински портал „Аксиос“.
Трамп вчера се состана со својот тим за национална безбедност за да разговара за напредокот на преговорите за Газа пред Виткоф и Кушнер да заминат за Египет, се вели на веб-страницата.
Според извештајот, високи американски претставници изразиле претпазлив оптимизам во врска со шансите за постигнување договор оваа недела и нагласиле дека Кушнер и Виткоф нема да го напуштат Египет без договор за ослободување на заложниците и завршување на војната.
Катарскиот премиер, шеикот Мухамед бин Абдулрахман ал-Тани, треба да замине за Шарм ел-Шеик подоцна во текот на денот за да се придружи на преговорите, кои започнаа во понеделник.
На 29 септември Трамп претстави план од 20 точки, кој вклучува ослободување на сите израелски заробеници во замена за палестинските затвореници, прекин на огнот, разоружување на палестинската група Хамас и обнова на Газа.
Од октомври 2023 година израелската војска уби над 67.100 Палестинци во Газа, повеќето жени и деца.
Немилосрдното бомбардирање ја направи енклавата несоодветна за живеење и доведе до масовно раселување, глад и ширење на болести.
