Бајден подготвен за соработка со Републиканците по изненадувањето од Демократите на изборите

ВАШИНГТОН (АА) – Американскиот претседател Џо Бајден ги нарече средномандатните избори „добар ден“ за демократијата и истакна дека е подготвен да работи со Републиканците, јавува Агенција Анадолија (АА).

Во обраќањето еден ден по изборите за избор на членови на двата дома на Конгресот, Бајден истакна дека по неговото патување во Индонезија за Самитот на Г-20 ќе се сретне со лидерите на Републиканската и Демократската партија за да разговараат како можат да работат заедно до крајот на оваа година.

„Мислам дека тоа беше добар ден за демократијата“, рече Бајден, осврнувајќи се на изборите во вторникот, на кои не беше постигнато убедливо водство на Републиканците.

„Нашата демократија беше тестирана во последниве години, но со своите гласови американскиот народ проговори и уште еднаш докажа дека демократијата е она што сме ние“, рече тој.

Американскиот претседател додаде дека „гласачите се сè уште фрустрирани“, но додаде дека неговата администрација „штотуку почнува“.

„Јас сум оптимист за тоа како јавноста ќе биде уште поприемлива за она што го направивме“, истакна тој.

„Демократите имаа силна ноќ“, рече Бајден. „Додека печатот и експертите предвидуваат огромен црвен бран, тоа не се случи.“

На прашањето дали размислува да се кандидира за претседател во 2024 година, Бајден рече: „Нашата намера е да се кандидираме повторно, без разлика каков е исходот од овие избори.“

Тој истакна дека ќе потврди дали ќе се кандидира „на почетокот на следната година“.