Велика Британија испраќа воени експерти во БиХ за зајакнување на мисијата на НАТО

ЛОНДОН (АА) - Британски воени експерти ќе бидат испратени во Босна и Херцеговина за зајакнување на мисијата на НАТО и промовирање на стабилноста и безбедноста во земјата, соопшти денеска Кабинетот на британскиот премиер Борис Џонсон, јавува Агенција Анадолија (АА).

Во соопштението се вели дека Босна и Херцеговина во моментов се соочува со најголема егзистенцијална закана во повоениот период, а сецесионистичките лидери активно работат на создавање дополнителни поделби и конфликти. Исто така, се додава дека овие планови се поддржани од официјална Москва како дел од напорите на рускиот лидер Владимир Путин да ги загрози евроатлантските интеграции и стабилноста на Босна.

„На барање на штабот на НАТО во Сараево, воен експерт за борба против дезинформации на Велика Британија и советник за цивилна стратешка одбрана ќе бидат распоредени за поддршка и обука на Вооружените сили на Босна и Херцеговина. Експертот за борба против дезинформации ќе ги зајакне седиштето на НАТО и способноста на Босна и Херцеговина да се спротивстави на опасните влијанија и ќе помогне во блокирањето на руските и другите напори за ширење недоверба и поткопување на демократијата во земјата и регионот. Новиот стратешки советник за одбрана ќе ги поддржи одбранбените реформи на земјата, помагајќи им да развијат модерни, репрезентативни вооружени сили според стандардите на НАТО“, се вели во соопштението.

Во соопштението, исто така, се вели дека Велика Британија ќе обезбеди 750.000 фунти за формирање центар за сајбербезбедност во рамките на Универзитетот во Сараево.

„Ова ќе ја зајакне одбраната на Босна и Херцеговина од сајбернапади, кои можат да им наштетат на луѓето внатре и надвор од земјата. Велика Британија тесно ќе соработува со медиумите и босанските институции за да ги опреми со алатки за идентификување и ублажување на ефектите од лагите и дезинформациите“, се вели во соопштението.

Се додава дека Министерството за одбрана на Велика Британија во моментов работи со Министерството на Босна и Херцеговина за земјата да ја задржи цврсто на евроатлантскиот пат, развивајќи ги способноста и издржливоста потребни на Вооружените сили на БиХ за да се справат со безбедносните предизвици.

„Оваа помош ја покажува водечката улога на Велика Британија во борбата против опасното влијание и зајакнувањето на безбедноста и стабилноста. Велика Британија покажа долгогодишна посветеност на мирот и безбедноста во регионот, почнувајќи од 1990-тите кога британските трупи беа составен дел од хуманитарните напори за време на војната во БиХ. Британските трупи оттогаш постојано ѝ служат на таа земја, помагајќи ѝ да се обнови и да го зачува и промовира мирот“, се истакнува.

Британскиот премиер предупреди дека Русија се обидува да ги промени успесите постигнати во последните три децении во Босна и Херцеговина.

„Не можеме да дозволиме Западен Балкан да стане уште едно тло за катастрофалните напори на Путин. Со разгорување на пламенот на сецесионизмот и секташтвото, Русија се обидува да ги смени успесите постигнати во последните три децении во Босна и Херцеговина, достигнувања кои донесоа поголема стабилност на целиот наш континент. Затоа ја зајакнуваме нашата поддршка за Босна и Херцеговина, одговараме на повикот на нашите пријатели да помогнеме во заштитата на мирот што со право го заслужуваат“, се вели во соопштението на британскиот премиер.

На крајот се наведува дека покрај воената поддршка на Вооружените сили на БиХ и НАТО, Велика Британија политички работи и на зачувување на Дејтонскиот мировен договор.

„Ги санкциониравме оние кои работат на поткопување на владеењето на правото во државата, а минатата година премиерот назначи нов специјален пратеник на Западен Балкан за борба против организираниот криминал и другите заеднички безбедносни предизвици“, се вели во соопштението од Кабинетот на британскиот премиер.