Ekipa
10 Февруари 2020•Ажурирај: 10 Февруари 2020
ИДЛИБ (АА) - Најмалку 17 цивили се убиени во нападите што во населените места на деескалациската зона во Идлиб ги извршија силите лојални на режимот на сирискиот претседател Башар ал Асад и руските воздушни сили, јавува Агенција Анадолија (АА).
Опозициската опсерваторија на воздушниот простор во Идлиб соопшти дека авионите на режимските сили на Асад и Русија синоќа извршиле жестоки напади во населените места на периферијата на Алепо, која е во границите на прогласената зона на деескалација во Идлиб.
Цивилната заштита (Бели шлемови) јавува дека во нападите се убиени најмалку 17 цивили и тоа девет во местото Кефер Наха, три во местото Али, две во местото Орум ес Сугра и три во Етариб.
Истиот извор јавува дека во нападите се ранети уште најмалку 30 цивили.
Идлиб е најголемо упориште на сириската опозиција во кое во моментот се наоѓаат речиси четири милиони жители. Тоа е двојно поголема популација од онаа што Идлиб ја имаше пред почетокот на војната во Сирија.
Со посредство на Турција, Русија и Иран, за време на мајските преговори во 2017 година во Астана, Идлиб е прогласен за деескалациска зона, како и регионите Хомс, Источна Гута и Дера Кунејтра.
Меѓутоа, режимските сили на Асад го искористија воспоставеното примирје и со поддршка на руските воздушни сили ги зазедоа сите три региони, додека Идлиб остана под контрола на опозицијата. Стотици илјади цивили од тие региони побегнаа во Идлиб и тоа во регионите на самата сириско-турска граница.
Во Сочи на 17 септември 2018 година е постигнат додатен договор за прекин на судирите во Идлиб. Согласно договорот, опозициските сили наредниот месец го повлекоа тешкото вооружување од Идлиб, а силите лојални на режимот на Асад набрзо продолжија со артилериските и воздушните напади во кои досега се убиени повеќе од 1.800 цивили.
Од јануари 2019 година од Идлиб во регионите на сириско-турската граница побегнаа повеќе од 1.677.000 цивили.
