Поранешниот израелски премиер Барак планот на Трамп за Газа го нарече „плод на имагинацијата“

АНКАРА (АА) - Поранешниот израелски премиер Ехуд Барак изјави дека никој не го сфатил сериозно планот на американскиот претседател Доналд Трамп за Појасот Газа и дека планот претставува „плод на имагинацијата“, известува Анадолу.

Барак за израелското армиско радио ги коментираше изјавите на Трамп за испраќање на Палестинците од Газа на други места и преземање на регионот од страна на САД.

Нарекувајќи го планот на Трамп за „плод на имагинацијата“, Барак го рече следното:

„Ова не изгледа како план што некој сериозно го разгледал. Повеќе личи на пробен балон или можеби обид да се сигнализира поддршката за Израел“.

Барак рече дека изјавите на Трамп можеби биле дадени за да се изврши притисок врз арапските земји „да предложат решение за ситуацијата во Газа и да го поддржат отстранувањето на Хамас од власта“.

Трамп на заедничката прес-конференција со израелскиот премиер Бенјамин Нетанјаху, кого го прими во Белата куќа, изјави дека САД ќе го преземат Појасот Газа.

Истакнувајќи дека Газа сега е огромна област која целосно е срамнета со земја, Трамп посочи дека би било многу подобро за Палестинците во Газа да се преселат во нови населби што ќе се градат во соседните земји, особено во Египет и Јордан.

Трамп смета дека Палестинците немаат друг избор освен да ја напуштат Газа.