Европската агенција препорача одобрување на вакцината против Ковид-19 на „Модерна“

БРИСЕЛ (АА) - Европската агенција за лекови (EMA) одлучи да ја препорача вакцината против коронавирусот (Ковид-19), развиена од компанијата „Модерна“, пренесува Агенција Анадолија (АА).

Комисијата за лекови за човечка употреба (CHMP) на ЕМА соопшти дека е донесена одлука за препорака за условно ставање во промет на вакцината против Ковид-19 развиена од американската фармацевтска компанија „Модерна“.

Во изјавата се истакнува дека вакцината е ефикасна 94,1 процент и дека може да се примени кај лица на возраст над 18 години.

Во оваа фаза, се очекува Комисијата на ЕУ да го потврди одобрувањето на ЕМА.

Претседателката на Европската комисија, Урсула фон дер Лајен, по одобрувањето од страна на Европската агенција за лекови (EMA), на својот профил на социјалните мрежи истакна:

„ЕМА процени дека вакцината на ‘Модерна‘ е безбедна и ефикасна. Сега работиме интензивно за да ја одобриме вакцината да биде достапна во ЕУ.“

Дистрибуцијата на оваа вакцина во земјите на ЕУ се очекува да започне наскоро по одобрувањето на Комисијата.

Американската администрација за храна и лекови (FDA) на 19 декември ја одобри вакцината развиена од „Модерна“.

Вакцината на „Модерна“ е втора вакцина одобрена во ЕУ по вакцината развиена од Фајзер/БајоНТех.

Европската агенција за лекови (EMA) на 21 декември ја одобри употребата на вакцината развиена од Фајзер/БајоНТех. По одобрувањето, на 27 декември низ цела ЕУ започна процесот на вакцинацијата.

ЕУ претходно има потпишано договори за купување 300 милиони дози вакцини од Фајзер/БајоНТех, 400 милиони дози од „АстраЗенека“, 300 милиони дози од „Санофи-ГСК“, 400 милиони дози од „Џонсон и Џонсон“, 405 милиони дози од вакцината на „КјурВак“ и 160 милиони дози од „Модерна“, вклучувајќи и опции.