Европскиот парламент го одобри трговскиот договор меѓу ЕУ и Велика Британија

БРИСЕЛ (АА) - Европскиот парламент денес објави дека официјално го усвоил договорот за идните односи меѓу Европската Унија и Велика Британија, јавува Агенција Анадолија (АА).

Европскиот парламент го одобри со огромно мнозинство - 660 гласа „за“, пет „против“ и 32 воздржани - договорот за трговија и соработка помеѓу Блокот и Велика Британија, објави европската институција во соопштението за медиумите.

Европските пратеници гласаа вчера, но резултатите беа објавени денес.

Велика Британија официјално ја напушти Европската Унија по 47 години членство на 31 јануари 2020 година, но на партнерите им требаше речиси една година да се договорат за идните економски врски.

Трговскиот договор, постигнат на 24 декември и одобрен сега од Европскиот парламент, вклучува нула квоти и нула тарифи за трговија со строги услови за правилата за фер конкуренција за економските оператори.

Од практични причини, договорот веќе е во примена во последните четири месеци.

Трговскиот договор се очекува официјално да стапи на сила на 1 мај по одобрувањето од Советот на Европската Унија што ги претставува владите на ЕУ.

Во посебна, законски необврзувачка резолуција, пратениците на ЕУ го нарекоа Брегзит „историска грешка“ и изразија жалење за одлуката на Обединетото Кралство за отфрлање на соработката во областа на безбедноста и надворешната политика, како и за крајот на програмите „Еразмус +“ за размена на студенти.

Европскиот парламент, исто така, ја предупреди Велика Британија да го почитува Договорот за повлекување, особено нејзиниот протокол за Северна Ирска.

Британскиот премиер Борис Џонсон го поздрави ратификувањето на трговскиот договор со објава на Твитер.

„Сега е време да се радуваме на нов однос со ЕУ и поглобална Британија“, додаде тој во својата порака.

Велика Британија гласаше за напуштање на ЕУ на жестоко оспоруваниот референдум во 2016 година.

Беа потребни три години за ЕУ и Владата на Велика Британија да склучат договор за условите за напуштање на ЕУ.

Договорот за повлекување содржи посебен трговски режим за Северна Ирска, што Велика Британија го оспорува од минатиот септември.