Зеленски: САД често се под влијание на руските реторики за војната во Украина

ИСТАНБУЛ (АА) - Украинскиот претседател Владимир Зеленски изјави дека Соединетите Американски Држави „многу често“ се под влијание на руските реторики за војната во неговата земја што трае повеќе од три години, јавува Анадолу.

„Не можам да бидам неблагодарен кон САД за сè што направија за нас, но денес – многу често, за жал, тие се под влијание на руските реторики, а ние не може да се согласиме со тие реторики“, изјави Зеленски во интервјуто во француската престолнина Париз на панелот со европски новинари доцна синоќа.

Зеленски нагласи дека САД и нивниот народ ја поддржуваат Украина од почетокот на конфликтот во февруари 2022 година, дека постои двопартиска поддршка и дека помошта продолжува да пристигнува во земјата погодена од војната.

„Украина ќе се спротивставува на руските реторики“, рече Зеленски, истакнувајќи:

„Ние едноставно немаме друг избор. Се бориме за нашата независност и за нашето постоење. Единствено може да ја откриваме вистината и да ја покажеме преку нашиот пример, како што се бориме на бојното поле.“

Запрашан за специјалниот пратеник на САД, Стив Виткоф, и дали смета дека Белата куќа „ја шири пропагандата на Кремљ“, Зеленски изјави дека Виткоф често ги цитира ставовите на Кремљ и дека тоа нема да ги доведе блиску до мир.

„Верувам дека, за жал, тоа ќе го ослаби американскиот притисок врз Русија. Единствено може да го коригираме ова информативно поле преку нашите акции. Се обидуваме да го направиме тоа“, додаде Зеленски.

Тој нагласи дека е неопходна јасна и решителна позиција на САД во поддршката на Украина, истакнувајќи дека Киев сака Американците да бидат на негова страна.

„Дури и ако Америка денес избрала да биде неутрална, неутралноста значи неутралност, а не приближување кон Кремљ, а тоа е важно“, потенцираше Зеленски.