Ikrame Imane Kouachi
13 Декември 2024•Ажурирај: 13 Декември 2024
АНКАРА (АА) - Израелскиот министер за одбрана Израел Кац денес ѝ наложи на израелската Армија да остане стационирана во тампон-зоната на сириската страна на планината Хермон во текот на зимските месеци по нејзината окупација на областа на 8 декември, денот кога антирежимските сили влегоа во Дамаск, принудувајќи го Башар ал Асад да побегне во Русија, јавува Анадолу.
„Поради она што се случува во Сирија, нашето одржување на врвот Хермон е од големо безбедносно значење“, рече Кац во изјавата.
„Мора да се направи сè за да се обезбеди подготовката на израелската Армија во областа, дозволувајќи им на војниците да останат во суровите временски услови“, додаде тој.
Одлуката за продолжување на престојот на Армијата во окупираната зона дојде откако Кац, началникот на Генералштабот, Херци Халеви, и други воени претставници се состанаа синоќа за да ја проценат ситуацијата во Сирија.
Силите на израелската Армија влегоа 2-10 километри длабоко во демилитаризираната тампон-зона покрај границата со Сирија, изјави за Анадолу израелски извор, кој претпочита да остане неименуван.
Тој, сепак, одби да ги прецизира сириските села во тампон-зоната каде што се распоредени израелските сили од „безбедносни причини“.
Израел ја освои тампон-зоната откако антирежимските сили го зазедоа Дамаск на 8 декември, соборувајќи го Башар ал Асад, лидерот на Сирија речиси 25 години, кој побегна во Русија по 13-годишна граѓанска војна и 53 години од неговото семејно владеење.
Според Силите за набљудување на ОН (УНДОФ), тампон-зоната „се протега преку 75 километри во должина и се движи во ширина од приближно 10 километри во центарот до 200 метри на далечниот југ“.
