Кремљ: „Загрижени сме поради случувањата во Ерменија, но тоа се внатрешни прашања“

МОСКВА

Портпаролот на Кремљ, Дмитри Песков, изјави дека Русија загрижено ги следи случувањата во Ерменија и порача дека тоа се внатрешни прашања на таа земја, јавува Агенција Анадолија (АА).

Песков на прес-конференцијата во Москва го искоментира повикот на американскиот воен врв за оставка на премиерот Никола Пашинјан, како и случувањата по тоа.

Тој изјави дека не се воспоставени контакти на високо ниво меѓу Русија и Ерменија, откако на Пашинјан му е упатен повик за оставка.

„Доколку биде потребно, таквиот состанок може брзо да се договори“, изјави Песков, и додаде:

„Загрижено го следиме развојот на случувањата во Ерменија, но она што се случи се внатрешни работи на Ерменија. Ги повикуваме сите страни да бидат внимателни. Веруваме дека ситуацијата ќе остане во уставни рамки.“

Премиерот на Ерменија, Пашинјан, денеска соопшти дека го разрешил началникот на Генералштабот, Оник Гаспарјан. Пред тоа, воениот врв на ерменската војска, вклучувајќи го началникот на Генералштабот, упати заедничка изјава во која повикува на оставка на премиерот. Пашинјан се огласи преку социјалните мрежи и ги повика своите поддржувачи да излезат на улиците.