Кремљ: Русија може да посредува меѓу Европа и Белорусија

МОСКВА

Русија може да дејствува како посредник за да помогне во решавањето на мигрантската криза на границата меѓу Белорусија и ЕУ, изјави портпаролот на Кремљ, Дмитри Песков, јавува Агенција Анадолија (АА).

Говорејќи на дневниот брифинг во Москва, Песков потсети дека рускиот претседател Владимир Путин веќе одржал серија телефонски разговори во врска со прашањето со германската канцеларка Ангела Меркел и со белорускиот претседател Александар Лукашенко.

„Забелешките на Путин за можноста за директни контакти дојдоа по телефонските разговори со германските и белоруските лидери“, рече Песков.

Запрашан за изјавата на американскиот државен секретар Ентони Блинкен, кој го обвини Лукашенко за отпочнување на мигрантската криза со цел да го одвлече вниманието „од активностите на Русија на границата со Украина“, Песков рече дека Блинкен „погрешно ја протолкувал“ ситуацијата на границата меѓу Белорусија и Полска.

„Русија нема никаква врска со кризата како и белорускиот претседател“, нагласи портпаролот.

„Мигрантите пристигнуваат таму (во Белорусија) користејќи го безвизниот режим за дополнително да добијат азил во Европа. Но, не им е даден азил и не им е дозволено да одат таму (во Европа)“, рече Песков.

Портпаролот изрази жалење што никој (во САД и ЕУ) не ги споменува идеалите на хуманизмот, судбините на илјадници бегалци кои речиси една недела живеат на границата под тешки временски услови.

„Затоа, изјавата (од САД) е фундаментално погрешна и ние не се согласуваме со неа“, рече тој.

Што се однесува до заканите на Лукашенко за можно прекинување на транзитот на гас од Русија во Европа преку Белорусија, Песков рече дека Москва се надева дека белорускиот претседател ќе се воздржи од преземање „емотивни одлуки“.

Претходно, Путин рече дека секој белоруски потег за намалување на транзитот на гас „нема да придонесе за развојот на руските односи со Белорусија како транзитна земја“.

Тој вети и дека ќе разговара со Лукашенко за ова прашање.