Elena Teslova
11 Октомври 2022•Ажурирај: 12 Октомври 2022
МОСКВА (АА) - Министерот за надворешни работи на Русија, Сергеј Лавров, денес изјави дека руската воена доктрина дозволува само одбранбена употреба на нуклеарно оружје, пренесува Агенција Анадолија (АА).
Говорејќи во интервју за рускиот ТВ-канал „Россија 1“, Лавров ги повика јавните лица да се воздржат од изјави кои вештачки ја зголемуваат можноста за нуклеарна војна.
„Се надевам дека оние кои постојано шпекулираат за прашањето за нуклеарна војна... се свесни за својата одговорност“, додаде Лавров.
„Апелирам до сите кои се заинтересирани за оваа состојба и се обидуваат да ја покријат во јавниот простор да се воздржат од вештачко подгревање на ситуацијата“, рече министерот.
Претходно, портпаролката на руското Министерство за надворешни работи, Марија Захарова, изјави дека западните новинари бараат од руските јавни личности да ги коментираат изјавите на јавните лица од САД и ЕУ за нуклеарната закана, а потоа да ја претстават на таков начин како Русија да му се заканува на светот со нуклеарна војна.
Портпаролот на Кремљ, Дмитриј Песков, одби да ги коментира наводите за можноста за нуклеарна војна воопшто, со надеж дека ќе престанат понатамошните шпекулации.
