Aysu Biçer
05 Март 2026•Ажурирај: 06 Март 2026
РИМ (АА) - Италија ќе продолжи да ги почитува постојните билатерални договори кои го регулираат користењето на американските воени бази на нејзина територија, изјави италијанската премиерка Џорџа Мелони, пренесува Анадолу.
Говорејќи во радиоемисија на РТЛ, Мелони нагласи дека Италија не примила никакво барање за користење на базите за воени операции против Иран.
„Во моментов немаме такво барање и сакам да кажам дека не сме во војна и не сакаме да влеземе во војна“, изјави таа.
Мелони истакна дека Италија ќе ги следи одредбите од долгогодишните билатерални договори со САД, кои датираат од 1954 година и овозможуваат користење на базите за одредени логистички и небoрбени операции.
„Тоа се технички одобрувања кога е јасно дека зборуваме за логистика и таканаречени некинетички операции. Едноставно кажано, операции кои не вклучуваат бомбардирање“, појасни таа.
Премиерката Мелони додаде дека, во случај на пошироко барање како што е користење на италијанските бази за борбени операции, Владата би ја разгледала ситуацијата заедно со Парламентот.
Мелони исто така предупреди на ризик од ескалација на конфликтот во регионот, нагласувајќи дека е загрижена поради конфликтот и реакцијата на Иран.
Таа рече дека моменталната ситуација претставува „ризик од ескалација која може да има непредвидливи последици“ и додаде дека е загрижена за можните последици врз Италија.
Италија, заедно со Велика Британија, Франција и Германија, разгледува испраќање одбранбена поддршка до земјите во регионот на Заливот.
Мелони изјави дека целта на тој потег е заштита на десетици илјади италијански државјани кои се наоѓаат во тој регион, како и на околу 2.000 италијански војници стационирани таму. Таа додаде дека регионот на Заливот е од клучно значење за снабдувањето со енергија.
Премиерката предупреди и на можните економски последици од кризата, истакнувајќи дека Владата ќе преземе мерки за да спречи шпекулации кои би можеле да доведат до раст на цените на енергијата и храната.
Таа додаде дека властите ги следат цените на гасот и дека компаниите кои ќе се обидат да ја искористат ситуацијата може да се соочат со повисоки даноци.
САД и Израел од саботата продолжуваат со обемни напади врз Иран, во кои загинале 926 лица, вклучително и врховниот лидер Али Хаменеи и повеќе високи воени функционери. Техеран возврати со напади со дронови и ракети врз Израел, како и врз земји од Заливот каде што се наоѓаат американски воени капацитети.
