Rania R.a. Abushamala
27 Декември 2025•Ажурирај: 28 Декември 2025
ИСТАНБУЛ (АА) - Мировник на ОН е повреден од огнена стрелба од позиции на израелската армија и експлозија на бомба во јужен Либан, објави во петокот УНИФИЛ, мисијата на ОН во оваа земја, известува Анадолу.
Мировната мисија соопшти дека тешката митралеска стрелба од израелски позиции јужно од Сината линија се случила во близина на патролата на УНИФИЛ која проверувала блокада на патот во селото Бастара, по што следела експлозија на граната во нивна близина.
„Од звукот предизвикан од пукотницата и експлозијата еден мировник има повреда на увото“, се наведува во соопштението.
Не е пријавена никаква штета.
Во врска со друг инцидент, УНИФИЛ информираше дека и втора патрола која извршувала „рутинска оперативна задача“ во селото Кфар Шуба пријавила митралеско пукање од израелска страна во непосредна близина на нивната позиција.
Мисијата на ОН соопшти дека однапред ја информирала израелската армија за патролните активности „следејќи ја вообичаената практика за патроли во чувствителни области во близина на Сината линија“.
Мисијата ги опиша инцидентите врз или во близина на мировниците како „сериозни прекршувања на резолуцијата 1701 на Советот за безбедност“, повторувајќи го својот повик до израелската армија „да престане со агресивното однесување и напади врз или во близина на мировниците кои работат за мир и стабилност по должината на Сината линија“.
Прекин на огнот во Либан е во сила од ноември 2024 година, по повеќе од една година напади во кои загинаа повеќе од 4.000 луѓе, а 17.000 беа повредени.
Најмалку 335 луѓе се убиени, а 973 се ранети во израелските напади од почетокот на прекинот на огнот, соопшти Министерството за здравство на Либан.
Израелската армија требаше да се повлече од јужен Либан во јануари 2025 година според договорениот прекин на огнот, но наместо тоа, само делумно се повлече и продолжува да одржува воено присуство на пет гранични пунктови.
