Најмалку 44 убиени во двоен терористички напад во Буркина Фасо

КИГАЛИ (АА) - Најмалку 44 лица се убиени во два одвоени терористички напади во регионот Сахел во северниот дел на африканската држава Буркина Фасо, известува Анадолу.

„Нападите се извршени во доцните вечерни часови во селата Кураку и Тондоби, што се наоѓаат на околу 5 километри од комуната Сејтенга во провинцијата Сено“, изјави гувернерот на регионот Сахел, поручник Родолф Сорго.

Тој рече дека во Кураку се убиени 31 лице, а во Тондоби 13 и дека тоа најверојатно не е конечниот биланс на настраданите, имајќи предвид дека повеќе лица се потешко ранети.

Поручникот Сорго порача дека одбранбените и безбедносните сили се на терен и работат на воспоставување на редот и стабилноста.

Буркина Фасо со децении е сцена на бунтови што се прелија од соседен Мали. Дејствуваат повеќе теористички групи поврзани со Ал Каеда и ДЕАШ.

Само минатата година во Буркина Фасо во терористички напади се убиени 1.135 лица, што е за 50 % повеќе во однос на претходната година.