Најмалку 7 убиени Палестинци во израелски напад врз болница во градот Газа

ГАЗА (АА) - Најмалку седум Палестинци се убиени денес во израелски воздушен напад врз болница во градот Газа, соопшти Службата за цивилна одбрана, јавува Анадолу.

Портпаролот Махмуд Басал изјави дека неколку луѓе се повредени во нападот на горниот кат на болницата Ал-Вафа во центарот на градот.

Според очевидци, израелски борбен авион го погодил горниот кат на болницата, каде што имало засолнети голем број раселени цивили.

Израелската армија продолжува со бруталната офанзива во Појасот Газа во која се убиени речиси 45.500 Палестинци, главно жени и деца, која започна по нападот на Хамас на 7 октомври минатата година, и покрај резолуцијата на Советот за безбедност на ОН со која се бара итен прекин на огнот.

Тел Авив наметна блокада на Газа, оставајќи го населението од 2,3 милиони на работ на глад.

Минатиот месец, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата поради неговите постапки во Газа.