ОН: Во Газа убиени повеќе деца отколку во сите војни во светот во последните четири години

ГАЗА (АА) - Филип Лазарини, генералниот комесар на Агенцијата на Обединетите нации за помош на палестинските бегалци на Блискиот Исток (УНРВА), изјави дека бројот на убиени деца во Газа е поголем од бројот на деца убиени во војните во последните четири години, јавува Анадолу.

Лазарини сподели објава на социјалните мрежи за децата убиени во израелските напади во Појасот Газа.

Податоците за децата убиени од израелската војска во Газа ги опиша како шокантни.

Лазарини изнесе податок дека бројот на убиени деца во Појасот Газа во израелските напади од 7 октомври е поголем од вкупниот број деца убиени во војните во светот во последните четири години.

„Ова е војна против децата. Војна против иднината на децата“, истакна тој.

Како што рече, во војните во светот во последните четири години се убиени 12.193 деца, додека во Газа се убиени над 12.300 деца.

Лазарини на крајот повика на итен прекин на огнот, особено поради децата во Газа.