По израелскиот напад изби пожар во болницата „Камал Адван“ Газа

ГАЗА (АА) - Директорот на болницата „Камал Адван“, Хусам Абу Сафије, денес изјави дека во одделот за интензивна нега избил пожар по израелскиот напад, јавува Анадолу.

Тој наведе дека одеднаш бил отворен оган од различни видови оружје кон одделот за интензивна нега.

„По некое чудо успеавме да ги евакуираме пациентите што беа на респиратори во одделот за интензивна нега“, рече Абу Сафије.

Тој потврди дека по нападот избувнал пожар во тој дел од болницата.

Абу Сафије рече дека персоналот на болницата се обидел да го изгасне пожарот со средствата што ги имал бидејќи веќе осум дена има недостиг на вода по нападот на израелската армија насочен кон резервоарите за вода и водоводната мрежа.

„Во моментов одделот за интензивна нега не е во функција и ситуацијата е катастрофална. Повеќе од 75 дена бараме помош од светот, но нема одговор“, нагласи Абу Сафије.

Абу Сафије изјави дека цел на израелската армија бил одделот за интензивна нега каде што се хоспитализирани 64 повредени лица и шест пациенти.

Наведувајќи дека бил погоден и покривот на болницата, Абу Сафије истакна дека е направена голема штета на генераторите за струја и мрежата за кислород.

Тој изјави дека нападите врз болницата ги загрозиле животите на пациентите и повредените.

„Живееме под бомбардирање и во страв. Оваа ситуација предизвикува голема паника, особено кај децата, жените, вработените во болницата и повредените. Минуваме низ мрачни денови“, додаде тој.