Повеќе од 60 мигранти се удавија во бродоломот во близина на брегот на Либија

КАИРО (АА) - Повеќе од 60 лица, вклучувајќи жени и деца, се удавија во близина на брегот на Либија кога се превртел брод со повеќе десетици мигранти кои се обидувале да стигнат во Европа, објави агенцијата на Обединетите нации за миграции, пренесува Анадолу.

Бродоломот што се случи денес е последната трагедија во овој дел на Средоземното Море. Станува збор за клучна, но опасна рута на мигрантите кои бараат подобар живот во обид да стигнат во Европа. Според податоците на официјалните лица, на оваа рута досега животот го загубиле илјадници луѓе.

Меѓународната организација за миграции (ИОМ) денес објави дека на бродот се наоѓале 86 мигранти. Бродот се превртел поради високите бранови недалеку од градот Зувара, на западниот брег на Либија. Во несреќата животот го загубиле 61 лице.

„Централниот дел на Средоземното Море и понатака е едно од најопасните мигрантски рути на светот“, наведе ИОМ на социјалната мрежа Х.

Либија последните години стана доминантна транзициска точка за мигрантите кои бегаат од војната и сиромаштијата во Африка и на Блискиот исток. Земјата е во хаос по бунтот што го поддржа НАТО, а во кој 2011 година од власта е соборен и убиен долгогодишниот лидер Муамер Гадафи.

Либија е главно почетно место за мигрантите кои се обидуваат да стигнат до европското копно преку опасниот централен дел на Средоземното Море. Според зборовите на портпаролот на ИОМ, Флавио ди Џакомо, повеќе од 2.250 луѓе ги загубија животите на рутата во централниот дел на Средоземното Море оваа година.

„Тоа е драматична бројка која, за жал, покажува дека не се прави доволно за да се спасат животите на луѓето“, напиша Ди Џакомо на социјалната платформа Х.

Според проектот на ИОМ за исчезнати мигранти, пријавено е дека животот го загубиле најмалку 940 мигранти, а 1.248 се водат за исчезнати во Либија во периодот од 1 јануари до 18 ноември оваа година.