Полска формираше воена единица за сајбербезбедност

ВАРШАВА

Полска објави дека формирала нова воена единица за сајбербезбедност, јавува Агенција Анадолија (АА).

Министерот за одбрана, Мариуш Блашчак, нагласи дека целите на единицата вклучуваат одбрана, извидување и каде што е потребно, заштита на Полските вооружени сили од сајбернапади.

„Свесни сме дека сајбернападите станаа алатки на политиката во 21 век и се користат и од нашиот сосед“, рече Блашчак, мислејќи на Русија.

Нагласувајќи дека силите за сајбербезбедност ќе бидат основен и клучен дел од Полските вооружени сили, Блашчак рече дека на чело на единицата е назначен генералот Корал Моленда од Полската армија.

Потегот доаѓа откако мејловите на Михал Дворчик, шефот на канцеларијата на полскиот премиер, протекоа од приватната електронска пошта во 2021 година и станаа достапни на интернет.