Rania R.a. Abushamala
22 Декември 2023•Ажурирај: 23 Декември 2023
ИСТАНБУЛ (АА) - Американската бродска компанија „Flexport Inc.“ објави дека речиси 170 бродови се пренасочени од теснецот Баб ел-Мандеб во Црвеното Море, а 35 бродови се запрени и чекаат инструкции од нивните компании, јавува Анадолу.
Според соопштението на компанијата со седиште во Сан Франциско, околу 170 контејнерски бродови се пренасочени околу Африка, а 35 други бродови се закотвени поради нападите во Црвеното Море.
Хусите во Јемен продолжуваат со своите закани дека ќе ги напаѓаат бродовите поврзани со Израел кои минуваат низ теснецот, кој се наоѓа јужно во Црвеното Море, во знак на солидарност со Палестинците во бомбардираниот Појас Газа.
Превозните компании ги пренасочуваат бродовите низ 'Ртот на Добрата Надеж за да избегнат потенцијални напади, со што имаат повисоки транспортни трошоци и продолжено време за испорака.
Денес, „Блумберг“ објави дека „трошоците за транспорт на стоки во контејнер од 40 метри од Азија до северна Европа скокнале за 16 отсто во текот на изминатата недела и се зголемени за 41 отсто во декември, според Светскиот индекс на контејнери објавен вчера. Паралелно на тоа скокаат и сметките за гориво, при што некои големи нафтени компании и компании сопственици на танкери велат дека ќе го избегнуваат јужниот дел на Црвеното Море.
Според извештајот на „Блумберг“: „На краток рок, тоа ќе ги зголеми трошоците и ќе предизвика неколкунеделни доцнења, а може да доведе и до зголемување на цените на одредени стоки.“
Овие тензии настануваат во еден од најфреквентните периоди од годината за извоз од Кина, бидејќи трговците на мало ги надополнуваат залихите по празниците и пред затворањето на кинеските фабрики за празниците за претстојната Лунарна нова година во февруари.
На 19 ноември, Хусите во Јемен објавија дека го заплениле бродот „Галакси лидер“, товарен брод во сопственост на израелски бизнисмен, во Црвеното Море, а потоа го донеле до јеменскиот брег.
Хусите предупредуваат дека цел им се бродовите во сопственост или управувани од израелски компании, „поради солидарност со Палестина“, и ги повикаа земјите да ги повлечат своите граѓани кои работат во екипажите на овие бродови.
