Diyar Güldoğan
23 Април 2024•Ажурирај: 24 Април 2024
ВАШИНГТОН (АА) - Десетици лица се уапсени во Универзитетот Њујорк (NYU) во Менхетен синоќа во пропалестинските протести во кампусот што ескалираа низ Соединетите Американски Држави (САД), пренесува Анадолу.
Според јавувањата на медиумите, полициските службеници од њујоршката полиција (NYPD) во целосна опрема за безредија влегле во кампусот на Универзитетот и привеле демонстранти кои ја осудуваа израелската офанзива во Појасот Газа, во која се изгубени повеќе од 34.000 животи.
Репресивните мерки на Универзитетот Њујорк се применети неколку часа откако полицијата уапси 45 лица на Универзитетот Јеил во Њу Хевен, Конектикат, и откако Универзитетот Колумбија во Њујорк објави дека се префрла на онлајн настава поради пропалестинските протести.
Претседателката на Универзитетот Колумбија, Минуш Шафик, која се соочува со зголемени повици да поднесе оставка, рече дека „децибелите“ на несогласувањата се зголемиле во последните денови.
„За да се деескалира гневот и да ни се даде шанса на сите да ги разгледаме следните чекори, објавувам дека сите часови ќе се одржат виртуелно во понеделник“, рече Шафик во изјавата.
Над 100 студенти, меѓу кои и ќерката на американската претставничка Илхан Омар, беа уапсени во Универзитетот Колумбија во четвртокот во текот на протестот откако Шафик ја повика полицијата да ги расчисти демонстрантите.
Сите 10 републиканци од Њујорк во Претставничкиот дом ја повикаа Шафик да се повлече од функцијата поради протестите.
Пратениците вчера во писмо до Шафик рекоа дека „анархија го зафатила“ училишниот кампус во Менхетен и ја обвинија претседателката дека не им обезбедила на студентите „безбедна средина за учење“.
