Русија високо ги цени напорите на турскиот претседател за мир

МОСКВА (АА) - Портпаролот на Кремљ, Дмитриј Песков, изјави дека Русија високо ги цени напорите на турскиот претседател Реџеп Таип Ердоган за мир, јавува Анадолу.

„Ние високо ги цениме напорите на господин Ердоган, неговите мировни активности, неговите обиди да обезбеди услуги за посредување и неговиот однос кон развојот на билатералните руско-турски односи“, рече Песков на брифингот со новинарите во Москва, коментирајќи ја идејата за номинирање на турскиот лидер за Нобеловата награда за мир.

Осврнувајќи се на претстојната тридневна посета на кинескиот претседател Си Ѓинпинг, Песков рече дека 21 март ќе биде ден на разговори, додека на 20 март Путин и Ѓинпинг ќе учествуваат на неформални настани.

Во врска со контроверзните извештаи за продолжување на Црноморската иницијатива за жито, Песков рече дека Русија се согласила за 60-дневен мандат.

Песков, исто така, го критикуваше иселувањето на монасите од Киевско-печерската лавра во главниот град на Украина, изразувајќи жалење што, според него, „овие незаконски дејствија на режимот во Киев не добиваат соодветна осуда од меѓународната заедница“.

„Најстрого ги осудуваме. Режимот во Киев уште еднаш го демонстрираше својот карактер со овие незаконски дејствија. Ова уште еднаш докажува и покажува дека сè што правиме е апсолутно исправно“, нагласи тој.

Во врска со одлуката Варшава да испорача борбени авиони „МиГ-29“ на Украина, Песков рече дека тоа е „уште еден пример за тоа како голем број земји членки на Северноатлантската алијанса, вклучително и Полска, го зголемуваат нивото на нивното директно учество во конфликтот“.

„Се разбира, за време на специјална воена операција, целата оваа опрема ќе биде предмет на уништување“, рече тој.

„Плановите на Словачка и Полска за трансфер на „МиГ-29“ во Украина изгледаат како отстранување на непотребното“, додаде Песков.

„Се чини дека овие земји на тој начин се ангажирани во отстранувањето на старата непотребна опрема“, нагласи портпаролот на Кремљ.