Русија: Погодени се 34 објекти на украинската воена инфраструктура

МОСКВА (АА) - Министерството за одбрана на Русија вчера соопшти дека во текот на денот, погодени биле 34 објекти на украинската воена инфраструктура, пренесува Агенција Анадолија (АА).

Говорејќи на дневниот брифинг во Москва, портпаролот на Министерството, Игор Конашенков, рече дека командниот пункт на 56. моторизирана бригада, базата на националистите, базата за гориво и испораката со странска воена опрема и оружје се уништени со високопрецизно оружје.

„Дополнително, две складишта со муниција, девет засолништа и области со воена опрема, како и едно беспилотно летало се погодени“, рече тој.

„Вкупно, од почетокот на специјалната воена операција, 125 авиони, 93 хеликоптери, 408 беспилотни летала, 227 противвоздушни ракетни системи, 1.897 тенка и други оклопни борбени возила, 216 повеќекратни ракетни фрлачи, 862 теренски артилериски оружја и минофрлачи, како и 1.888 единици на специјални воени возила беа уништени“, рече тој.

Конашенков, исто така предупреди дека според разузнавачките информации, украинските специјални служби подготвуваат голема провокација со употреба на токсични супстанции во градот Первомаиски во регионот на Харков.

„На територијата на производствената асоцијација „Химпром“, Службата за безбедност на Украина минира складиште со 120 тони хлор. Ова складиште се планира да биде разнесено за да се обвини Русија за создавање хемиска катастрофа која предизвикала смрт на локалните жители.“

Руската војна во Украина, која започна на 24 февруари, доведе до меѓународна осуда, а ЕУ, САД и Велика Британија, меѓу другите, воведоа строги финансиски санкции на Москва.

Најмалку 1.563 цивили се убиени во Украина и 2.213 се повредени, според проценките на ОН, а се стравува дека вистинската бројка е многу повисока.

Повеќе од 4,27 милиони Украинци пребегаа во други земји, а милиони други се внатрешно раселени, според Агенцијата за бегалци на ОН.