Самитот на НАТО заврши со сесијата за тероризмот и ситуацијата во Северна Африка

МАДРИД (АА) - Тридневниот Самит на НАТО во Мадрид заврши денеска со сесијата за тероризмот и ситуацијата во Северна Африка, јавува Агенција Анадолија (АА).

Шефовите на држави и влади и министрите за надворешни работи и за одбрана на 30-те земји членки на НАТО присуствуваа на сесијата на последниот ден од Самитот.

На седницата присуствуваа и турскиот претседател Реџеп Таип Ердоган, министерот за надворешни работи, Мевлут Чавушоглу и министерот за национална одбрана, Хулуси Акар.

Додека италијанскиот премиер Марио Драги го напушти Мадрид синоќа за да се врати дома поради несогласувањата меѓу коалициските партнери, италијанскиот министер за одбрана, Лоренцо Гуерини, присуствуваше на завршната сесија.

На отворањето на сесијата, генералниот секретар на НАТО, Јенс Столтенберг, рече дека регионот на Северна Африка и Сахел се соочуваат со меѓусебно поврзани безбедносни, демографски, економски и политички предизвици.

„Овие предизвици“, рече тој, „се влошени од влијанието на климатските промени и несигурноста со храната што произлезе од руската војна против Украина.“

„Во наш интерес е да продолжиме да работиме со нашите блиски партнери на југ за да се бориме заедно со заедничките предизвици.“

„Денеска ќе разговараме за тоа како НАТО може да се справи со причините за нестабилност и како да ги засили нашите напори во борбата против тероризмот“, рече Столтенберг.

Во новиот Стратешки концепт одобрен на Самитот во Мадрид, НАТО го дефинира тероризмот како најдиректна закана за меѓународната безбедност и мир.

Дополнително, естонската премиерка Каја Калас, говорејќи за новинарите на Самитот, рече дека очекуваат изненадување од Русија откако Финска и Шведска добија покана за зачленување во НАТО.

Калас рече дека Русија може да започне хибридна војна или кибернапади.