Севернокорејскиот лидер ја повика воената индустрија да го прошири производството на повеќекратни ракетни лансери

ИСТАНБУЛ (АА) - Севернокорејскиот лидер Ким Џонг Ун им наложи на надлежните да го прошират производството на артилериски оружени системи, вклучително и на повеќекратни ракетни лансери, пренесува Анадолу.

Тој ја издаде директивата за време на посетата на голем воено-индустриски објект за време на викендот, објавија денес државните медиуми.

Ким рече дека повеќекратниот ракетен систем, кој ќе биде „главно средство за напад“ на Корејската народна армија, „целосно ќе го промени“ составот на артилериските сили и „ќе игра клучна улога“ во „воената стратешка политика на Пјонгјанг за модернизација и зајакнување на артилеријата со долг дострел“, објави Корејската централна новинска агенција.

Вооружениот систем, кој ќе биде распореден во големи количини за концентрирани напади за време на воени операции, е „супермоќен систем на оружје, бидејќи може да го уништи непријателот преку ненадејни прецизни удари со голема точност и разорна моќ, а може да се користи и како стратешко средство за напад“, додаде тој.

Ким истакна дека целите за производство на муниција ќе бидат утврдени на деветтиот Конгрес на Работничката партија на Кореја.