Merve Gül Aydoğan Ağlarcı
04 Ноември 2022•Ажурирај: 04 Ноември 2022
АНКАРА (АА) – Поддршката на Туркије за Украина во текот на судирите ги намали „некои од ефектите на бруталната војна“, изјави денес шефот на НАТО, Јенс Столтенберг, пофалувајќи ги напорите на Анкара, јавува Агенција Анадолија (АА).
„Сакам да се заблагодарам на Туркије за целата нејзина поддршка на Украина. Врвните беспилотни летала и бродови направени во Туркије помагаат во одржувањето на правото на Украина на самоодбрана“, рече генералниот секретар Столтенберг на заедничката прес-конференција со турскиот министер за надворешни работи Мевлут Чавушоглу во Истанбул.
„Туркије е многу ценет сојузник на НАТО и дава важен придонес за нашата заедничка безбедност. Играте главна улога во борбата против тероризмот, вклучувајќи ја и нашата мисија во Ирак“, рече Столтенберг.
Столтенберг ги поздрави напорите на Туркије и претседателот Реџеп Таип Ердоган „за преговорите за безбеден премин на украинското жито преку Црното Море и ублажување на глобалната криза со храна“, велејќи дека спроведувањето на договорот за жито ја покажува важната улога што Туркије ја игра во конфликтот во Украина.
„Дипломатските напори на Анкара го поддржуваат и го овозможуваат“ договорот за жито, рече Столтенберг, а размената на затвореници е „исклучително важна“ за намалување на „некои од ефектите од бруталната војна што се одвива во Украина“.
