Судан: Повеќе од 19.000 лица се затворени од паравоените Сили за брза поддршка во Дарфур

ИСТАНБУЛ (АА) – Повеќе од 19.000 луѓе се во заложништво на паравоените Сили за брза поддршка (РСФ) во Јужен Дарфур, во западен Судан, соопштија локалните медицински лица денес, јавува Анадолу.

Суданската докторска мрежа на американската платформа за социјални медиуми Х објави дека повеќе од 19.000 лица се затворени во затворите Дагрис и Кобер, кои се најголемите притворски центри во сојузната држава Јужен Дарфур.

Според медицинската група, меѓу задржаните има 5.434 лица од цивилни професии, меѓу кои 73 здравствени работници, како и бројни политичари и медиумски работници.

Мрежата предупреди на растечки број смртни случаи меѓу притворениците, кои ги поврза со драматично влошените услови — акутен недостиг од медикаменти, пивка вода и храна, пренатрупаност во ќелиите, лоша хигиена, отсуство на медицинска изолација и ширење на заразни болести.

„Повеќе од четири смртни случаи неделно се регистрирани поради медицинска негрижа, недостиг од квалификуван персонал и отсуство на прва помош или можност за транспортирање на критичните случаи до болница“, се додава во соопштението.

Групата ги повика ОН и другите меѓународни организации да извршат притисок врз РСФ за ослободување на цивилните притвореници и обезбедување заштита на сите задржани во согласност со хуманитарните и правните стандарди.

Конфликтот меѓу суданската Армија и РСФ, кој започна во април 2023 година, досега однесе илјадници животи и е причина за раселување на милиони луѓе.

Од 18-те судански сојузни држави, РСФ контролира пет во регионот Дарфур, со исклучок на неколку северни делови од Северен Дарфур кои остануваат под команда на Армијата. Во преостанатите 13 држави – на југ, север, исток и центар, вклучително и главниот град Картум – контролата ја има суданската Армија.