Трамп „не бил воодушевен“ од рекламната кампања на Ноем од 220 милиони долари за доброволно напуштање на земјата

ИСТАНБУЛ (АА) - Американскиот претседател Доналд Трамп вчера посочи дека разрешувањето на секретарката за домашна безбедност Кристи Ноем не било толку поради незадоволство од нејзината работа, туку поради желбата на нејзино место да го назначи сенаторот Марквејн Малин, републиканец од Оклахома, јавува Анадолу.

Говорејќи јавно првпат по нејзиното разрешување, Трамп ја пофали Ноем за повеќе од едногодишниот мандат, а позитивно се изрази и за Малин.

„Таа е одлична личност. Заврши добра работа. Јас сум голем обожавател на сенаторот од Оклахома. Не беше тешка одлука“, изјави Трамп во телефонскиот разговор за телевизијата Ен-би-си.

Тој ги отфрли сугестиите дека конкретен инцидент довел до нејзиното разрешување и ја пофали нејзината работа во справувањето со прашањата поврзани со границата.

Сепак, Трамп изрази критика за размената на мислења меѓу Ноем и сенаторот Џон Кенеди за време на сведочењето пред Конгресот претходно оваа недела.

„Не бев воодушевен од тоа. Потрошив помалку пари од тоа за да станам претседател. Не знаев за тоа“, рече тој, осврнувајќи се на нејзиното одобрување на федерални договори, вклучително и рекламна кампања вредна 220 милиони долари со која се повикуваат имигрантите доброволно да ја напуштат земјата.

Ноем се соочи со дополнителни критики и по имиграциската операција во Минеаполис, во која федерални службеници за спроведување на законот смртно застрелале двајца американски државјани.

На сослушувањето во Сенатот, таа му рече на Кенеди дека Трамп бил запознаен со нејзината одлука да ја одобри скапата рекламна кампања, чии договори биле доделени преку постапка што ограничувала конкурентно наддавање.