Трамп: „Ракетите можеби ги кршат резолуциите на ОН, но не и Договорот со Ким“

ВАШИНГТОН

Американскиот претседател Доналд Трамп истакна дека ракетните тестирања можеби ги прекршуваат резолуциите на Обединетите нации, јавува Anadolu Agency (AA).

Трамп на својот профил на Твитер напиша дека Пјонгјанг тестирал три ракети од краток дострел, додавајќи дека тоа сепак не е во спротивност со Договорот постигнат во Сингапур.

„Ким не сака да ме разочара“, рече Трамп, потсетувајќи дека постојат многу нешта што Пјонгјанг може да ги загуби.

„Северна Кореја во петокот лансираше проектили со краток дострел во неутралните води“, објави Јужна Кореја.

Од заедничкиот Генералштаб информираа дека проектилите се лансирани околу 15 часот по локално време. Проектилите се лансирани од истото подрачје како и при последните тестирања на Северна Кореја во средата и четвртокот.

Државните севернокорејски медиуми претходно предупредија дека неодамнешните лансирања се предупредување за Јужна Кореја пред планираните заеднички воени вежби со САД овој месец.