Франција: Сè додека Израел не ја укине блокадата, во Газа нема да може да се постигне постојана стабилност

АНКАРА (АА) - Франција истакна дека нема да се постигне трајна стабилност во Газа без укинување на блокадата на Израел, пренесува Агенција Анадолија (АА).

Во соопштението на Министерството за надворешни работи се наведува задоволството од прекинот на огнот постигнат на 7 август по израелскиот напад врз Газа.

Се потенцира дека Франција го цени посредништвото на Египет и посредувањето обезбедено со поддршка на Обединетите нации (ОН) и Катар.

Франција ги повика страните да ги почитуваат своите обврски за да се избегнат дополнителни тензии и цивилни жртви.

Меѓу другото, во соопштението се наведува дека Франција жали за загубата на цивилни животи и повикува трајно да биде отворен пристапот до Газа за хуманитарна помош, внесување гориво, како и за брз трансфер на ранетите и болните.

Посочувајќи дека нема да има постојана стабилност во Газа без укинување на блокадата од страна на Израел, во соопштението се додава дека Франција ќе продолжи со напорите за повторно воспоставување „политички хоризонт“ со своите европски и регионални партнери, со цел да се воспостави праведен и траен мир.

- Израелските напади врз Газа и прекинот на огнот -

Во петокот Израел изврши напади врз цели за кои тврдеше дека му припаѓаат на движењето Исламски џихад.

По израелскиот напад, од Газа беа истрелани низа ракети во правец на Израел.

Како резултат на израелските напади на Појасот Газа, животот го загубија 44 Палестинци, од кои 14 деца и 4 жени, додека на израелска страна немаше загуба на животи.

Прекинот на огнот, што беше постигнат меѓу страните со посредство на Египет, стапи на сила на 7 август.