Хамас разговараше со шефот на египетското разузнавање за прекин на огнот во Газа и договор за размена на заложници

ГАЗА (АА) - Делегација на палестинската група на отпорот Хамас синоќа разговараше со шефот на египетското разузнавање во Каиро за постигнувањето прекин на огнот во Појасот Газа и договор за размена на заложници со Израел, пренесува Анадолу.

„Делегација од движењето пристигна во Каиро и се сретна со Абас Камел“, се вели во соопштението на Хамас.

„Делегацијата ги истакна барањата на Хамас, неговата желба да постигне договор со кој ќе се постигне целосен прекин на непријателствата, повлекување на окупациските сили од Појасот Газа, слободно враќање на раселените лица во нивните региони и места на живеење, помош за нашиот народ и почеток на обновата на она што е уништено од окупацијата“, се вели во него.

Хамас ја нагласи неопходноста од „постигнување договор за размена на заложници во чии рамки ќе се ослободат палестинските затвореници во замена за ослободување на (израелските) заложници приведени од Хамас и отпорот во Газа“.

Во соопштението се додава дека „Хамас ја потврдува својата решеност, заедно со сите палестински сили и фракции, за постигнување на нашите национални цели и за воспоставување наша палестинска држава со целосен суверенитет, со главен град Кудс (Ерусалим), право на враќање и самоопределување“.

Претходно вчера израелскиот воен совет одлучи да прати делегација во Каиро за да учествува во преговорите за постигнување договор за размена на заложници со Хамас, јавија израелските медиуми.

Катар, Египет и САД се обидуваат да постигнат договор за размена на заложници и прекин на огнот во Газа. Првата хуманитарна пауза во борбите траеше само една недела кон крајот на ноември минатата година, што резултираше со влез на ограничена помош во Појасот Газа, како и размена на израелски заложници за палестински затвореници, главно жени и деца, притворени во израелските затвори.

Израел држи најмалку 9.100 Палестинци во своите затвори, а се проценува дека во Газа има околу 134 израелски заложници. Хамас објави дека во израелските воздушни напади загинале 70 од нив.

Израел спроведува смртоносна воена офанзива во Појасот Газа по прекуграничниот напад на почетокот на октомври минатата година од страна на палестинската група Хамас во кој загинаа околу 1.200 луѓе.

Оттогаш се убиени речиси 33.200 Палестинци, а околу 75.900 се повредени во жестоките израелски напади.

Израел, исто така, воведе целосна блокада на Појасот Газа, оставајќи го неговото население, особено жителите на Северна Газа, на раб на глад.

Според Обединетите нации, израелската војна принуди 85 отсто од населението на Газа внатрешно да се раселат, предизвика акутен недостиг на храна, чиста вода и лекови, а 60 отсто од инфраструктурата на енклавата се оштетени или уништени.

Израел е обвинет за геноцид пред Меѓународниот суд на правдата (МСП), кој неодамна побара од него да стори повеќе за да се спречи глад во Газа.