Холандија: 1.675 деца одземени од семејствата поради грешка на државните органи

АМСТЕРДАМ (АА) – Институтот за статистика на Холандија (CBS) објави дека 1.675 деца се одделени од своите семејства како резултат на грешките во некои проценки што ги направиле службениците на Даночната служба, јавува Агенција Анадолија (АА).

Институтот го објави бројот на деца земени под државна заштита од семејства кои се соочиле со правни, социјални и финансиски проблеми во периодот 2015 - 2021 година, до кои дошло поради лошото управување со поддршката за згрижување деца.

Во соопштението се наведува дека поради грешките во проценките што ги направиле службениците на Даночната служба, на семејствата им биле скратени бенефициите за детска грижа под обвинение за „фалсификување документи“ и ретроспективно, од семејствата била побарана да вратат голема сума, а тоа предизвикало финансиски колапс на семејствата, по што децата им биле одземени со образложение дека ја занемариле грижата за нив.

На барање на холандското Министерство за правда и безбедност, ажурирани се листите за надомест за грижа на деца, по што е дојдено до податокот дека 1.115 деца „по грешка“ биле земени под државна заштита во периодот 2015 - 2020 година, а 560 деца во 2021 година.

Холандската Влада минатиот месец формира специјален тим кој ќе работи заедно со општините и центрите за младинска грижа, со цел децата под државна заштита да можат повторно да се обединат со своите семејства.

– Во Парламентот ќе се расправа за ставање на децата под државна заштита -

Во студијата што ја спроведоа педагози и адвокати од Универзитетот „Лајден“ во Холандија, утврдено е дека правниот систем во земјата е недоволен за да ги заштити децата кои биле земени под државна заштита поради финансиски тешкотии на нивните семејства.

Се забележува дека судиите не биле во можност соодветно да проценат дали е неопходно децата да се стават под државна заштита и за можноста за нивно повторно обединување со своите семејства.

Холандскиот Парламент денеска ќе расправа за наодите од ова истражување.

– Илјадници семејства по грешка се прогласени за „измамници“ -

Холандската Даночна служба одлучи да им ги укине додатоците на некои семејства кои примале помош за детска грижа и да ја повлече помошта, поради погрешни или нецелосни пријави, недоволна документација, измама и фалсификувани документи.

Истражната комисија, формирана во декември 2020 година од страна на холандскиот Парламент, откри дека десетици илјади семејства кои добивале помош за детска грижа, од владините службеници биле погрешно означени како „нечесни“ и против овие семејства биле преземени мерки.

Во извештајот што го подготви Комисијата се наведува дека државните службеници направиле грешки при прегледот на приходите на семејствата кои примале помош за згрижување деца од одредено етничко потекло и на оние со двојно државјанство.

Владата поднесе оставка во јануари 2021 година, откако излезе на виделина дека е извршена дискриминација. Покрај тоа, им бил исплатен надомест на семејствата кои биле жртва на дискриминацијата и страдале поради прекинот на бенефициите за грижа.