Шпанија: Жителите на Ла Палма поради ерупцијата на вулканот принудени да останат во домовите

МАДРИД (АА) - Официјалните претставници на островот Ла Палма, Шпанија, ги советуваа жителите во близина на вулканот да останат во домовите поради обилниот пепел, поради кој се откажани голем број летови и е запрена наставата, пренесува Агенција Анадолија (АА).

Во соопштението кое во вторникот го објавија службите за итни случаи на Канарските Острови, е наведено дека квалитетот на воздух на тоа подрачје е особено низок поради големото количество честички во воздухот.

Откажани се и сите летови кон и од островот.

Вулканот Кумбре Виеха, кој е активен од 19 септември, шест недели исфрла лава и пепел.

Експертите не очекуваат дека вулканот ќе згасне за брзо време.