Necva Taştan Sevinç
23 Септември 2025•Ажурирај: 24 Септември 2025
ИСТАНБУЛ (АА) - Советот на министри на Шпанија денес одобри „целосно“ ембарго на оружје за Израел, со што се зголемува притисокот врз Владата на израелскиот премиер Бенјамин Нетанјаху поради убивањето на Палестинците во Газа, пренесува Анадолу.
Министерот за економија Карлос Куерпо изјави дека одлуката е „уште еден доказ за политичката посветеност на Владата и меѓународното предничење на Шпанија и на премиерот за почитување на човековите права“, објави „Ел Паис“.
Ембаргото, кое претходно го објави премиерот Педро Санчез, ги надминува претходно воспоставените делумни ограничувања и вклучува забрана за извоз на оружје, транзит на гориво и увоз на производи и услуги од окупираните територии.
„Шпанија веќе имаше делумни забрани, како што направија Словенија, Белгија и Холандија, но со оваа мерка ние сме прва земја што забранува извоз на оружје, транзит на гориво и увоз... отворајќи го патот за ЕУ“, се вели во соопштението на левичарскиот коалициски партнер Сумар.
Сепак, лидерката на Подемос, Јоне Белара, го критикуваше тајмингот, велејќи дека потегот дошол предоцна.
„Ембаргата за оружје се спроведуваат пред да се извршат воени злосторства, а не со 60.000 невини жртви“, рече таа.
Конзервативната опозициска Народна партија (ПП) ја остави својата поддршка за ембаргото „во воздух“, а портпаролката на Парламентот, Естер Муњоз, рече дека партијата ќе почека да го види текстот на кралскиот декрет.
Муњоз предупреди на потенцијални ризици за „безбедноста“ на Шпанија, истакнувајќи дека „многу компоненти“ што ги користат шпанските безбедносни сили се од израелско потекло.
„Барам да не се тривијализира; тоа е комплексно прашање“, додаде таа.
Портпаролката на Владата и министерка за образование, Пилар Алегрија, го повтори ставот на Шпанија за признавање на Палестина, потсетувајќи на изјавите на Санчез во ОН.
„Како што нагласи премиерот во ОН, признавањето на државата Палестина е итно. Шпанија го стори тоа во мај, а сега гледаме дека многу земји, како Франција, Португалија, Канада, Велика Британија и Австралија, го следат примерот. Шпанија одигра клучна улога од самиот почеток во поддршката на коегзистенцијата преку решение со две држави“, рече Алегрија.
Претходно, на 9 септември, Шпанија објави пакет санкции од девет точки за Израел, но до денес го одложи одобрувањето на целосно ембарго на оружје и поврзаните мерки од „технички и правни причини“.
