Јапонските студенти побараа прекин на секаков вид соработка со Израел

ИСТАНБУЛ (АА) - Во екот на глобалниот бран на студентска солидарност со Палестинците, студентите во Јапонија побараа прекин на секаков вид соработка со Израел, вклучително и военото истражување, јавува Анадолу.

Пропалестинските студенти, кои поставија камп во Универзитетот во Кјото, денес доставија меморандум до универзитетската администрација, барајќи од претседателот Нагахиро Минато јавно да го осуди насилството врз палестинските цивили.

Студентските протести за поддршка на Палестинците, кои се соочуваат со немилосрдно бомбардирање од страна на Израел од 7 октомври, ги потресоа универзитетските кампуси низ светот, а полицијата и разузнавачките агенции спроведуваат рации во студентските кампови во САД.

Во повелбата од четири точки споделена со Анадолу, Здружението на Универзитетот во Кјото за солидарност со палестинскиот народ ја повика универзитетската администрација да го поништи меморандумот за разбирање со Универзитетот Тел Авив во Израел „каде што се спроведуваат воени истражувања“.

„Го повикуваме Универзитетот во Кјото да се воздржи од секаква форма на соработка, партнерство или поддршка што, директно или индиректно, ѝ помага на израелската војска во нејзините акции против палестинските цивили“, се бара во меморандумот.

Меморандумот вклучува и „запирање на финансирањето за истражувањата, трансферот на технологија или која било друга форма на помош што може да се користи за насилство или кршење на човековите права“, се наведува во меморандумот.

Здружението, исто така, побара универзитетот да „обезбеди помош и поддршка за палестинските студенти“, покрај промовирање дијалог и разбирање.

„Со охрабрување на отворена дискусија и различни перспективи може да придонесеме во напорите за градење мир и да промовираме емпатија и меѓусебно почитување меѓу студентите и професорите.“

Масаши Кавано, кандидат за докторат и член на Здружението, за Анадолу изјави дека властите на Универзитетот во Кјото „вработуваат чувари за да ги следат движењата на студентите и дека има чести репресии“.

„Но досега ситуацијата не е толку агресивна како во САД или Европа“, рече Кавано, мислејќи на задушувањето на пропалестинските студентски протести во САД и Европа.

Кавано истакна дека Здружението е активно од 2019 година и „нашите главни активности досега беа студиски групи и филмски проекции за Палестина.“

„Организиравме собири по неприфатливото влошување на ситуацијата по 10/7 (7 октомври)“, рече тој.

Пропалестински протести се одржуваат и во Австралија и во Јужна Кореја.