Групата за пријателство ЕУ - Турција: „Сите теми што се на дневен ред меѓу ЕУ и Турција можат да се надминат“

ИСТАНБУЛ (АА) - Претседателот на Групата за пријателство на Европската Унија (ЕУ) - Турција, Ришард Чарнецки, истакнa дека напнатоста во надворешната политика никогаш нема да биде во интерес на меѓународните односи, потенцирајќи дека сите теми што се наоѓаат на дневен ред меѓу ЕУ и Турција можат да се надминат, пренесува Агенција Анадолија (АА).

Според соопштението на Одборот за меѓународни економски односи (DEİK), Одборот одржал состанок преку видеоконференција со претседателот на Групата за пријателство на Европската Унија (ЕУ) - Турција, Ришард Чарнецки.

Чарнецки нагласил дека геостратешката позиција на Турција е многу значајна за Европа и дека треба да продолжат да се унапредуваат билатералните односи.

Тој, истакнувајќи дека е очигледно значењето на Турција во регионот, рекол дека е важно да го разберат тоа и нејзините европски партнери.

„’Рбетот на односите ЕУ - Турција го сочинуваат билатералните трговски и инвестициски односи. Групата за пријателство ЕУ - Турција ќе послужи како мост помеѓу носителите на одлуки и деловниот свет. Ова е причината зошто ажурирањето на Царинската унија е важно и е во интерес на сите. Во Парламентот ќе продолжиме да го истакнуваме прашањето за ажурирање на Царинската унија“, нагласи Чарнецки.

Истакнувајќи дека напнатоста во надворешната политика никогаш нема да биде во интерес на меѓународните односи, тој рече: „Сите теми што се наоѓаат на дневен ред меѓу ЕУ и Турција можат да се надминат. Во Парламентот ќе продолжиме да ја поддржуваме правната позиција на Турција.“

Чарнецки, исто така, наведе дека драстичните промени што ќе се случат откако ќе заврши пандемијата, ќе ја покажат потребата дека двете страни имаат потреба едни од други и дека односите ќе се зајакнат.

Турскиот заменик-министер за надворешни работи, амбасадорот Фарук Кајмакчи, истакна дека Полска е дестинација број еден којашто ја претпочитаат турските студенти и дека поддршката на Чарнецки за Турција во Европскиот парламент е многу вредна.

Тунч Угдул, амбасадорот на Турција во Варшава, потсетувајќи дека целта е обемот на трговската размена меѓу Турција и Полска да се зголеми на 10 милијарди долари, рече дека верува оти ќе го достигнат одредениот обем.