Ердоган: Туркије силно ги осудува сите видови напади насочени кон единството на Сирија

Турскиот претседател Реџеп Таип Ердоган денес изјави дека Анкара „остро“ ги осудува сите видови напади насочени кон интегритетот и општествениот мир на Сирија, како и актите на тероризам и заплашување, јавува Анадолу.

Сегашната ситуација во Сирија во голема мера е ставена под контрола со „ефикасната интервенција“ на сириските владини сили, рече Ердоган во обраќањето до нацијата по состанокот на владата во Претседателскиот комплекс, предупредувајќи дека ситуацијата на теренот останува чувствителна.

Анкара ги поздравува умерените и смирувачки изјави на сирискиот претседател Ал Шара, како и неговата цврста порака дека ќе бидат казнети оние кои дејствуваат надвор од законот, рече Ердоган.

Туркије презема мерки на претпазливост за да се осигура дека нема развој на настани против Туркије, додаде Ердоган, повикувајќи ја Сирија брзо да ја ублажи тензичната атмосфера.

„Не нѐ интересира ничија етничка припадност, религија или секта во Ирак, Сирија, Либан или која било друга земја во регионот“, рече турскиот претседател и додаде:

„Каде стоеше Анкара кога беа масакрирани еден милион Сиријци од режимот на Баас, на истото место стои цврсто исправена и денес“.

За врските меѓу Туркије и земјите од ЕУ во услови на зголемена загриженост за безбедноста по забелешките на американскиот претседател Доналд Трамп во врска со НАТО и војната меѓу Русија и Украина, Ердоган рече „Анкара се надева дека нејзините европски пријатели ја разбираат новата улога на Туркије во преобликувањето на светот и во согласност со тоа, ги прилагодува своите стратегии.

Ердоган ја изрази желбата на земјата да ги подобри односите со ЕУ во перспектива насочена кон целта за полноправно членство.

Порачувајќи дека се урива глобалниот систем кој за себе тврди дека е заснован врз правила, претседателот на Туркије истакна:

„Неговите основачи се оние кои му задаваат најсилни удари на меѓународниот поредок“.