Mikail Bıyıklı
09 Мај 2025•Ажурирај: 10 Мај 2025
ИСТАНБУЛ (АА) - Турскиот претседател Реџеп Таип Ердоган им го честита на европските граѓани 9 Мај, Денот на Европа, јавува Анадолу.
Според соопштението на профилот на социјалните мрежи на претседателската Дирекција за комуникации при турското Претседателство, претседателот Ердоган во својата честитка истакнува дека Денот на Европа е симбол на процесот на политичка и економска интеграција на Европа, кој започна со Шумановата декларација во 1950 година.
Нагласувајќи дека Европската Унија, олицетворение на европската интеграција, се соочува со повеќедимензионални глобални и регионални предизвици последните години, Ердоган рече: „Се разговара за иднината на европската безбедносна архитектура, молкот за масакрите во Газа во текот на 19 месеци и неуспехот да се развие ефикасна политика за запирање на нападите на Израел ги доведуваат во прашање вредностите на Унијата.“
Нагласувајќи дека на ЕУ денес ѝ е потребна визионерска и храбра перспектива, Ердоган истакна: „Во овие тешки времиња инклузивна и интегративна Европска Унија, која не е заробеник на интересите на своите поединечни членови, туку се фокусира на заедничките интереси на континентот, е во интерес на сите. Нашата земја, која е кандидат за членство во ЕУ, и покрај сите пречки со кои се соочува, исто така, е гаранција за опстанокот на Унијата со своите хуманитарни, мировни и конструктивни политики и праведни решенија при кризи и конфликти.“
„Всушност, неодамнешните трансатлантски и глобални случувања, кои влијаеја врз целиот свет и предизвикаа преиспитување на традиционалните политики, уште еднаш ја покажаа важноста на односите меѓу Турција и Унијата“, посочи турскиот претседател.
„И покрај неправедниот став на некои поединци и групи што тврдат дека ги претставуваат институциите на Европската Унија против нашата земја одвреме-навреме“, Ердоган рече дека сè уште верува дека ЕУ „ќе покаже разумност да дејствува со долгорочна и стратегиска перспектива врз основа на заемна корист во наредниот период. Во оваа пригода на европските граѓани, особено на моите граѓани, им го честитам Денот на Европа.“
