Турција: Изречени пресуди на терористите на ФЕТО кои го водеа неуспешниот обид за пуч од базата „Акинџи“

АНКАРА (АА) - Во случајот против обвинетите во предметот кој ги опфаќа настаните во Воздухопловната база „Акинџи“, која служеше како команден центар за време на обидот на пуч во Турција, на 15 јули 2016 година кој го извршија терористите на ФЕТО инфилтрирани во редовите на турската војска, четворица т.н. „цивилни имами“ се осудени на 79-кратна доживотна казна затвор под строги услови, јавува Агенција Анадолија (АА).

Четвртиот казнен суд во Анкара денеска им изрече казни на обвинетите.

Претседателот на Судот, Селфет Гирај, соопшти дека Кемал Батмаз, Хакан Чичек, Харун Биниш и Нуретин Оруч, т.н. цивилни имами кои се наоѓале во базата „Акинџи“ за време на обидот на пуч осудени се на по 79-кратна казна доживотен затвор под строги услови поради обид за соборување на уставниот поредок, обид за атентат на претседателот и убиство со намера.

Адил Оксуз, Кемал Батмаз, Хакан Чичек, Нуретин Оруч и Харун Биниш, по наредбата на водачот на терористичката организација, Фетула Ѓулен, раководеа со неуспешниот обид за пуч во базата „Акинџи“ на 15 јули 2016 година, кои во претходните месеци вршеа подготовки за тоа.

Припадникот на ФЕТО, Мустафа Мете Кајгусуз, за пренесување на наредбите за бомбардирање на пилотите на „Ф-16“ е осуден на 79-кратна доживотна казна. Поранешниот командант Бекир Ерџан Ван, кој обезбедувал гориво за авионите за бомбардирање на Анкара, е осуден на доживотна затворска казна.

Поранешниот пилот, Мустафа Азиметли, кој со ласер ја означи Управата за полициска авијација, е осуден на доживотна казна.

Терористот на ФЕТО, поранешниот пилот Мустафа Озкан, е осуден на трикратна доживотна робија за бомбардирање на зградата на Дирекцијата на полицијата во Анкара.

Поранешниот пилот Угур Узуноглу, кој за време на обидот за пуч ја бомбардираше Управата за специјални сили на полицијата, е осуден на 45-кратна доживотна казна.

Поранешниот мајор Мехмет Фатих Чавур, кој за време на обидот за пуч го изврши првиот лет со „Ф-16“ во Анкара, е осуден на 79-кратна доживотна казна затвор.

Пучистот на ФЕТО, пилотот Хасан Хусну Баликчи, е осуден на тешка доживотна казна за бомбардирање на Парламентот на Турција.

Поранешниот пилот Хусеин Турк, кој ја бомбардираше Управата на специјалната единица на полицијата, ТУРКСАТ и Парламентот, е осуден на 79-кратна доживотна казна.

Пилотот Муслим Маџит, кој за време на обидот на пуч уби 15 луѓе во близина на претседателскиот комплекс, е осуден на 16 тешки доживотни казни.

Поранешниот генерален секретар на Командата на воздушните сили, полковникот на пучистите, Вејсел Кавак, е осуден на 79-кратна доживотна казна по строги услови.

Одвоени се предметите на шестмина пребегнати пучисти меѓу кои се водачот на терористите на ФЕТО, Фетула Ѓулен и „цивилниот имам“ Адил Оксуз.

Изрекувањето на пресудата на останатите пучисти ќе биде продолжено, а со предметот се опфатени повеќе од 460 обвинети.

Воздушната база „Акинџи“ кај Анкара се смета за команден центар од кој терористичката организација ФЕТО раководеше со воениот удар на 15 јули 2016 година.

Терористичката организација ФЕТО е одговорна за крвавиот обид за пуч во Турција, ноќта на 15 јули, 2016 година.

Станува збор за терористичка организација предводена од Фетула Ѓулен, кој живее во Соединетите Американски Држави (САД), и чија екстрадиција Турција официјално ја побара од САД.

Припадниците на терористичката организација, со години, преку местење испити напредуваа во службата, инфилтрирајќи се на тој начин во институциите на државата. Потоа, најпрвин во декември 2013 година, членовите на ФЕТО во правосудството на Турција со монтиран процес за наводна корупција се обидоа да процесуираат бројни високи функционери.

Неколку години подоцна следуваше и неуспешниот крвав обид за државен удар на терористите на ФЕТО, односно обид за пуч, што го изведоа офицерите кои ФЕТО ги инфилтрираше во турската војска.

Истрагата во врска со терористичката организација ФЕТО покажа дека се работи за глобална мрежа која не претставува опасност само за Турција, туку и за секоја друга земја во која е активна. На тоа во повеќе наврати укажуваа турските функционери. Во текот на обидот за државен удар во Турција загинаа 251, а ранети беа околу 2.200 лица.