ИСТАНБУЛ
Турскиот министер за надворешни работи, Мевлут Чавушоглу, изјави дека сликите од украинскиот град Буча се срамни за човештвото и неприфатливи, јавува Агенција Анадолија (АА).
За новинарите во Брисел, Чавушоглу изјави дека разговарал со неговиот украински колега Дмитро Кулеба и му кажал дека „најновите слики од Буча се навистина неприфатливи, срамни за човештвото“, и дека ја пренел непријатноста која тие ја чувствуваат во врска со тоа.
Турскиот министер за надворешни работи се осврна на сцените на очигледни масакри на цивилите во Буча, во близина на Киев, кои предизвикаа широкораспространет гнев.
Чавушоглу е во Брисел каде што присуствуваше на вториот и последен ден од состанокот на министрите за надворешни работи на НАТО за руско-украинската војна.
Руската војна против Украина, која започна на 24 февруари, предизвика меѓународен гнев, при што ЕУ, САД и Велика Британија, меѓу другите, воведоа строги финансиски санкции кон Москва.
Најмалку 1.611 цивили се убиени во Украина и 2.227 се повредени, според проценките на Обединетите нации (ОН), а се стравува дека вистинската бројка е многу поголема.
Според Агенцијата за бегалци на ОН, повеќе од 4,3 милиони Украинци побегнале во други земји, а уште милиони се внатрешно раселени.
- „Разговорите за Ф-16 напредуваат позитивно“
За разговорите со Соединетите Американски Држави (САД) за модернизација на турските борбени авиони Ф-16 и купување нови, Чавушоглу рече дека тие напредуваат позитивно.
Тој, исто така, ја нагласи важноста на писмото од американскиот Стејт департмент во кое му се кажува на Конгресот дека потенцијалната продажба на борбени авиони Ф-16 на Турција ќе им служи на американските интереси и ќе го зајакне единството на НАТО.
Наз Дуракоглу, највисоката функционерка на Стејт департментот за законодавни прашања, во писмо до конгресменот Френк Палоне ги призна тековните тензии околу дополнителната продажба на оружје за Турција, но остана на тоа дека санкциите и отстранувањето на Ф-35 претставуваат значајна цена, платена за стекнување на С-400.
САД, под водство на поранешниот претседател Доналд Трамп ја санкционираа Турција во 2020 година, откако Анкара го купи напредниот руски систем за воздушна одбрана С-400, и ја отстрани Турција од заедничката програма за борбените авиони Ф-35.
САД тврдат дека С-400 може да се користи од Русија за тајно да добие податоци за Ф-35 и дека системот е некомпатибилен со системите на НАТО. Сепак, Анкара тврди дека С-400 нема да биде интегриран во системите на НАТО и дека не претставува ризик за Ф-35.
Чавушоглу, исто така, ја повтори непријатноста на Турција во различни прашања поврзани со САД што ги гледа како прашања на националната безбедност, вклучително и помошта што Вашингтон ја дава на терористичката организација ЈПГ/ПКК во Сирија и нејзиното снабдување со оружје и обука.
Истакнувајќи дека разговорите во понеделникот меѓу високиот дипломатски персонал на САД и Турција во Анкара биле позитивни откако претседателот Џо Бајден предложи заеднички стратешки механизам меѓу двете земји, Чавушоглу рече дека американскиот државен секретар Ентони Блинкен го поканил во Вашингтон на 18 мај.
Тој додаде дека на таа средба за овој механизам ќе разговара на ниво на министри за надворешни работи. „Сакаме овој механизам да биде ориентиран кон резултати и ефикасен“, додаде тој.
- Напорите за нормализација на односите со Египет
За односите меѓу Турција и Египет, Чавушоглу рече дека Анкара ќе продолжи да презема чекори за нивно нормализирање.
Истакнувајќи дека Анкара и Каиро меѓусебно ги повлекле своите амбасадори во 2013 година, Чавушоглу рече дека амбасадите на двете земји се претставени на ниво на вршители на работи.
Тој рече дека мандатот на вршителот на должноста во Турската амбасада во Каиро истекол и дека ќе биде назначен нов дипломат во истиот ранг.
„Кога ќе одлучиме да именуваме меѓусебни амбасадори, секако дека ќе именуваме амбасадори.“
- Велика Британија ги укина извозните ограничувања
Чавушоглу истакна и дека разговарал со британската министерка за надворешни работи, Лиз Трас.
„Ги следевме прашањата што дојдоа до израз на средбата меѓу [британскиот] премиер Борис Џонсон и нашиот претседател [Реџеп Таип Ердоган] во оваа сала пред околу 15 дена“, рече тој, додавајќи дека едно од овие прашања се однесува за моторот на турскиот национален борбен авион ТФ-Икс (TF-Х).
„Велика Британија ги укина извозните ограничувања“, рече Чавушоглу, поздравувајќи ја одлуката.
„Во одбранбената индустрија сакаме да ја подобриме нашата соработка во важни проекти, вклучително воени авиони, воени бродови и носачи на авиони“, рече тој, додавајќи дека за време на неговиот состанок со британскиот колега, тие, исто така, ги следеле одлуките донесени за подобрување на соработката меѓу двете земји, особено во областа на енергетиката.
Истакнувајќи дека треба да се прошири и Договорот за слободна трговија, Чавушоглу рече дека се очекува да се сретне со неговата британска колешка и министрите за внатрешни работи на двете земји.
