Spanja mbyll kufirin tokësor me Francën

Spanja ka mbyllur kufirin tokësor me Francën në kuadër të masave të shumta të ndërmarra në luftën e përhapjes së koronavirusit të ri (COVID-19), raporton Anadolu Agency (AA).

Spanja, vend evropian më i prekur nga koronavirusi pas Italisë, ka mbyllur përkohësisht kufijtë tokësorë të saj me Francën.

Pas vendimit, policia kufitare spanjolle ktheu automjetet e huaja që përpiqeshin të hyjnë në vend nga Franca në pikën kufitare në qytetin Irun.

Nga ana tjetër, qeveria spanjolle ka ndaluar shkarkimin e punonjësve nga puna shkaku i koronavirusit derisa të ndalet kriza shëndetësore e vendit.

Ministrja spanjolle e Punës, Yolanda Diaz, deklaroi se askush nuk mund ta përdorë këtë krizë si mundësi për shkarkimin e punonjësve nga puna.

Sipas të dhënave të fundit nga Ministria e Shëndetësisë e Spanjës, në vend 4.858 persona kanë vdekur nga koronavirusi, ndërsa mbi 64 mijë kanë rezultuar pozitivë ndaj koronavirusit.