Arrestohet bashkëshorti i ish-kryeministres skoceze, Sturgeon

Zyrtari shumëvjeçar i Partisë Kombëtare Skoceze (SNP) Peter Murrell (58), bashkëshorti i ish-kryeministres skoceze Nicola Sturgeon, u arrestua në lidhje me hetimet për financimin dhe financat e kësaj partie politike, transmeton Anadolu.

Murrell është në paraburgim duke u marrë në pyetje nga detektivët, njofton Policia e Skocisë.

Në kuadër të hetimeve, punonjësit e policisë po kryejnë kontrolle në disa adresa, shtohet më tej.

Policia ka ngritur një tendë të madhe para shtëpisë së çiftit në Glasgow ndërsa një prani e konsiderueshme e policisë mund të shihet edhe në selinë e SNP-së në Edinburg.

Murrell dha dorëheqje si shef i SNP-së pasi mori përgjegjësinë për mashtrimin e mediave në lidhje me numrin e anëtarëve të partisë.

SNP përmes një komunikate deklaroi se nuk është e udhës të komentohet për hetimet policore, por se partia bashkëpunon plotësisht në këtë hetim dhe do të vazhdojë ta bëjë këtë.