Pekini hedh poshtë pretendimet për stërvitjen e trupave ruse në Kinë

Pekini sot hodhi poshtë pretendimet se trupat ruse janë stërvitur në Kinë gjatë luftës në Ukrainë, raportuan mediat shtetërore, transmeton Anadolu.

Deklarata nga Pekini erdhi pasi Gjermania e ngriti çështjen me Kinën pas asaj që Berlini i quajti raporte "thellësisht shqetësuese" për trajnimin e supozuar të ushtarëve rusë.

"Ambasadori i Kinës në Gjermani është takuar së fundmi me zyrtarë të Ministrisë së Jashtme gjermane me kërkesën e tyre, gjatë të cilit të dyja palët shkëmbyen pikëpamje mbi marrëdhëniet Kinë-Gjermani dhe çështje me interes të ndërsjellë", u tha gazetarëve në Pekin, zëdhënësja e Ministrisë së Jashtme kineze, Mao Ning.

Berlini thirri ambasadorin kinez për një takim urgjent javën e kaluar mbi këtë çështje.

Mao tha se Kina e ka bërë tashmë qëndrimin e saj "të qartë" dhe "të ashtuquajturat raporte janë të pabaza dhe thjesht të fabrikuara për të njollosur Kinën", tha ajo në përgjigje të një pyetjeje lidhur me takimin e Berlinit, i cili thuhet se u përqendrua në raportet që pretendonin se ushtarët rusë kanë marrë trajnim në Kinë, sipas "Global Times", gazetës shtetërore me seli në Pekin.

"Për krizën e Ukrainës, Kina ka mbajtur vazhdimisht qëndrim objektiv dhe të paanshëm, ka mbetur e përkushtuar ndaj promovimit të një zgjidhjeje politike të krizës dhe ka vazhduar të inkurajojë bisedimet e paqes në mënyrën e vet. Gjermania duhet ta shohë qëndrimin e Kinës në mënyrë objektive dhe racionale", shtoi Mao.