Mbretëria e Bashkuar dhe ‘BioNTech’ nënshkruan marrëveshje për provat e reja të vaksinave të kancerit

Mbretëria e Bashkuar ka nënshkruar një marrëveshje me kompaninë gjermane të bioteknologjisë ‘BioNTech’ për “trajtime të reja novatore të kancerit”, transmeton Anadolu.

Qeveria britanike tha se duke u bazuar në një memorandum të mirëkuptimit të muajit janar, “partneriteti do t’u sigurojë pacientëve me kancer qasje të përmirësuar në provat dhe terapitë më të fundit të kancerit që po zhvillohen aktualisht”.

Kjo përfshin provat klinike me bazë në Mbretërinë e Bashkuar që synojnë të ndihmojnë në trajtimin e pacientëve përmes përdorimit të “imunoterapive precize që funksionojnë duke stimuluar sistemin imunitar për të njohur dhe eliminuar qelizat e kancerit”.

Në njoftimin e qeverisë britanike theksohet se qëllimi është që deri në vitin 2030 t’u ofrohet qasje në trajtime të personalizuara deri në 10 mijë pacientëve.

"BioNTech" tashmë ka filluar të kryejë prova klinike në Mbretërinë e Bashkuar dhe gjithashtu planifikon të ndërtojë laboratorë të rinj në Kembrixh.

“Kjo marrëveshje e re historike na çon një hap më afër ofrimit të trajtimeve të reja të kancerit që shpëtojnë jetën për mijëra pacientë në të gjithë vendin”, tha kryeministri britanik, Rishi Sunak.

Sipas kryeministrit britanik, vaksinat e personalizuara të kancerit kanë potencialin për të “revolucionarizuar plotësisht” mënyrën e trajtimit të kancerit.

Shefi ekzekutiv dhe themeluesi i kompanisë ‘BioNTech’, Uğur Şahin, tha se “nëse është i suksesshëm, ky bashkëpunim ka potencialin të përmirësojë rezultatet për pacientët me kancer jo vetëm në Mbretërinë e Bashkuar, por edhe në mbarë botën”.