Parlamenti i Turqisë do të zgjedhë kryetarin e ri

ANKARA (AA) - Parlamenti i Turqisë pritet të zgjedhë kryetarin e ri më 24 shkurt pas njoftimit të spikerit aktual për largimin e tij nga detyra për të garuar në zgjedhjet lokale për postin e kryebashkiakut të Stambollit, raporton Anadolu Agency (AA).

Nënkryetari Celal Adan mori përsipër detyrën pasi kryeparlamentari Binali Yıldırım, i cili po kandidon për kryebashkiak të Stambollit, njoftoi dorëheqjen përpara zgjedhjeve lokale të 31 marsit.

Dorëheqja e Yıldırımit pritet të zyrtarizohet rreth datës 19 shkurt, kurse zgjedhja e pasardhësit të tij planifikohet të ndodhë më 24 shkurt.

Në përputhje me kushtetutën, zgjedhja e kryetarit të ri zhvillohet nëpërmjet votimit të fshehtë.

Partia e Lëvizjes Nacionaliste (MHP) ka njoftuar se do të mbështesë kandidatin e Partisë për Drejtësi dhe Zhvillim (AK) në pushtet.

Në dy raundet e para të votimit, të paktën 401 nga 600 vota të deputetëve nevojiten për të fituar postin e kryetarit.

Ndërkaq, nëse nevojitet raund i tretë, atëherë do të duhen vetëm 301 vota dhe në një raund të mundshëm të katërt, shumica e thjeshtë mjafton për të fituar.