Parlamenti turk nis seancën e mbyllur për situatën në Liban dhe rajon

Parlamenti turk filloi sot një seancë për të diskutuar sulmet e Izraelit ndaj Libanit dhe zhvillime të tjera në rajon, raporton Anadolu.

Ligjvënësit do të informohen nga qeveria gjatë seancës së mbyllur në kryeqytetin Ankara, të kryesuar nga kryetari Numan Kurtulmuş, i cili tha se ministri i Jashtëm Hakan Fidan dhe ministri i Mbrojtjes Kombëtare Yaşar Güler do të flasin për agjendën në fjalë.

Në fjalën e tij para seancës së mbyllur, Kurtulmuş tha se “Do të përmbushim të gjitha përgjegjësitë tona për të shuar këtë zjarr në rajon”.

“Si Asambleja e Madhe Kombëtare e Türkiyes, ne duhet të bëjmë hapa të fortë përpara në unitet dhe solidaritet kundër politikave ekspansioniste të Izraelit në rajon, të cilat ne i shohim si një problem të sigurisë kombëtare”, shtoi Kurtulmuş.

Izraeli ka kryer sulme masive ajrore në gjithë Libanin kundër atyre që i pretendon si objektiva të Hezbollahut që nga 23 shtatori, duke vrarë më shumë se 1.250 njerëz, duke plagosur 3.618 të tjerë dhe duke zhvendosur më shumë se 1,2 milion njerëz.

Fushata ajrore ishte një përshkallëzim në luftën ndërkufitare njëvjeçare midis Izraelit dhe Hezbollahut që nga fillimi i ofensivës brutale të Tel Avivit në Rripin e Gazës që ka vrarë afro 42.000 njerëz, kryesisht gra dhe fëmijë, që nga një sulm i Hamasit tetorin e vitit të kaluar.

Të paktën 2.083 njerëz janë vrarë dhe 9.869 të tjerë janë plagosur në sulmet izraelite në Liban që atëherë, sipas autoriteteve libaneze.

Pavarësisht paralajmërimeve ndërkombëtare se rajoni i Lindjes së Mesme është në prag të një lufte rajonale mes sulmeve brutale të Izraelit në Gaza dhe Liban, Tel Avivi e zgjeroi konfliktin duke nisur më 1 tetor një pushtim tokësor në Libanin jugor.