Ushtria turke përfundon raundin e nëntë të patrullimit në Munbixh

ANKARA (AA) - Forcat e Armatosura të Turqisë përfunduan misionin e tyre të nëntë patrullues në qytetin verior të Sirisë, Munbixh, i cili është pjesë e marrëveshjes së arritur mes Turqisë dhe SHBA-ve për pastrimin e rajonit nga organizata terroriste YPG/PKK, transmeton Anadolu Agency (AA).

Sipas një njoftimi të Shtatmadhorisë së Turqisë, forcat turke dhe ato amerikane zhvilluan patrullimet në mënyrë të pavarur dhe të koordinuar në linjën mes Munbixhit dhe rajonit të çliruar më herët nga terroristët përmes operacionit antiterrorist turk "Mburoja e Eufratit".

Patrullimi i parë i ushtrisë turke është realizuar më 18 qershor.

Marrëveshja për Munbixhin e arritur midis Turqisë dhe SHBA-ve synon tërheqjen e organizatës terroriste YPG/PKK nga qyteti verior i Sirisë.

Marrëveshja u njoftua për herë të parë pas një takimi në Washington më 4 qershor midis ministrit të Jashtëm të Turqisë, Mevlut Çavuşoğlu dhe Sekretarit amerikan të Shtetit, Mike Pompeo.

Nëse modeli rezulton i suksesshëm, Turqia ka paralajmëruar marrëveshje të ngjashme edhe në Sirinë lindore.

Në fushatën e saj terroriste më shumë se 30-vjeçare kundër Turqisë, PKK ka shkaktuar vdekjen e rreth 40.000 njerëzve, përfshirë gra dhe fëmijë. YPG është dega siriane e PKK-së.

SHBA, e cila ka mbështetur YPG/PKK-në nën pretekstin e luftës kundër DEASH-it, i kishte garantuar Turqisë se YPG/PKK do të tërhiqej nga qyteti pas pastrimit nga DEASH-i, por një gjë të tillë nuk e kishte realizuar.

Mbi 90 për qind e popullsisë së Munbixhit përbëhet nga arabët.