نرخی خاوی برێنت گەیشتە ٤١ دۆلار و ١٧ سەنت

ئیستانبوڵ- AA

بەرمیلێک خاوی برێنت بە ٤١ دۆلار و ١٧ سەنت مامەڵەی پێوە دەکرێت.

دوێنێ نرخی بەرمیلێک خاوی برێنت گەیشتە ٤٠ دۆلار و ٦٢ سەنت و رۆژەکەشی بە ٤٠ دۆلار و ٨١ سەنت تەواو کرد.

کاتژمێر ٠٩:٢٢ی بەیانی ئەمڕۆ نرخەکە سەدا ٠،٨٨ هەڵکشانی بەخۆوەبینی و گەیشتە ٤١ دۆلار و ١٧ سەنت.

لە هەمان کاتدا بەرمیلێک نەوتی رۆژئاوای تێکساس بە ٣٨ دۆلار و ٨٨ سەنت مامەڵەی پێوەکرا.

بەهۆی زریانی زێتا لە ئەمریکا، پاڵاوگاکانی کەنداوی مەکسیک کارەکانیان وەستاندووە و ئەمەش رۆڵی هەبوو لە بەرزبوونەوەی نرخەکاندا.

فەرمانگەی ئاسایش و کاروباری ژینگەیی سەربە وەزارەتی ناوخۆی ئەمریکا، ئەوەی ئاشکرا کرد بەهۆی زریانەکەوە سەدا ١٥،٨ی بەرهەمهێنانی نەوت و سەدا شەشی بەرهەمهێنانی غازی سروشتی لە پاڵاوگەکانی کەنداوی مەکسیک کەمی کردووە.

لە لایەکی دیکەشەوە، دووبارە چالاکبوونەوەی کێڵگەکانی لیبیا و دەستکردنەوەیان بە هەناردەکردنی نەوت وای کردووە رێژەی ئەو سووتەمەنییە لە بازاڕەکاندا زیاد بکات و ئەمەش رێگرە لە هەڵکشانی زیاتری نرخی نەوت.

هەروەها بڵاوبوونەوەی ڤایرۆسی کۆرۆنا لە جیهاندا هۆکارێکی دیکەی کەمبوونەوەی خواستە لەسەر نەوت و بە نزمی هێشتنەوەی نرخەکان.