هەولێر - AA هێمن حوسێن
وەستا یونس سەعید ماوەی ٤٥ ساڵە لەسەر شۆستەیەکی ناو بازاڕی شاری هەولێر کاری کڕین و فرۆشتنی تەسبیح دەکات و تا ئەمڕۆش لە پیشەکەی بەردەوامە.
ئەو لە کۆتایی ساڵانی حەفتاکاندا، دەستی بە پیشەی کڕین و فرۆشتنی تەسبیح کردووە و، ئێستاش لەسەر شۆستەیەکی ناو باغی شار لە هەولێر، لەسەر چەند پارچە کارتۆنێک دانیشتووە و لە رێگای مێزەکەی بەردەمییەوە کاری ڕۆژانەی خۆی دەکات.
وەستا یونس سەعید لەبارەی پیشەکەیەوە بۆ ئاژانسی ئانادۆڵو گوتی: "دوو ساڵ بەر لە دەستپێکی شەڕی نێوان عێڕاق و ئێران (١٩٧٨) لەم بازاڕە دەستم بە پیشەی کڕین و فرۆشتنی تەسبیح کرد و تا ئەمڕۆش لە پیشەکەم بەردەوامم".
ئەو لەبارەی شێوازی پیشەکەیەوە گوتی: "جاران چەند کەسێک بووین لێرە کاری کڕین و فرۆشتنی تەسبیحمان دەکرد، جۆرەکانی تەسبیحیش زۆر بوو وەک ئینجیر، کارەبا( کەهرەمان)، سەندەلووس و چەند جۆرێکی دیکە، ئەوکات پێچەوانەی ئێستا، جۆری قەزوان خواستی لەسەر نەبوو، بەڵام بەم دواییە خواستی کەوتەسەر و ئێستا جۆرێکی باوە و بەهاکەشی زۆرە".
"دوو ساڵ بەر لە دەستپێکی شەڕی نێوان #عێڕاق و #ئێران (١٩٧٨)
— Anadolu Soranî (@aasorani) October 11, 2023
لەم بازاڕە دەستم بە پیشەی کڕین و فرۆشتنی تەسبیح کرد و تا ئەمڕۆش
لە پیشەکەم بەردەوامم"
وەستایەک ٤٥ ساڵە لە #هەولێر کاری کڕین و فرۆشتنی #تەسبیح دەکات https://t.co/nnFDmAdy5E pic.twitter.com/8rY8W7BpFn
وەستا یونس سەعید ئاماژە بە بەها و جۆری تەسبیحەکان دەکات بەراورد بە ساڵانی ڕابردوو و لەمبارەیەوە گوتی: "ئەگەر بەراورد بە نرخەکان بکەین، دەبینین بۆ نموونە جۆرێکی تەسبیح ٤٠ ساڵ لەمەوبەر بەهاکەی یەک دەرهەم بوو، ئێستا هەمان تەسبیح بە ١٠٠ هەزار دینارە".
تەسبیح جۆری زۆرە، ھەندێکیان ھاوردە دەکرێن و ھەندێکیان خۆماڵین، ئەوانەی خۆماڵین بریتین لە جۆری قەزوان کە بە باشترین جۆری تەسبیح دادەنرێت و لەمبارەیەوە وەستا یونس سەعید گوتی: "جۆری قەزوان خۆماڵییە، ئەوانی دیکە زۆربەی تەسبیحەکان لە تورکیا، ئێران و سووریا هاوردە دەکرێن، هەروەها جۆری سەندەلووس لە هەموویان زیاتر خواستی لەسەرە کە ئەویش لە چەند وڵاتێکەوە هاوردە دەکرێت".
لەبارەی نرخەکانی ئێستاشەوە، وەستا یونس سەعید گوتیشی: "ئێستا نرخەکان زۆر ڕوون نین بەڵام جۆری کارەبایی بەهاکەی نزیکەی سێ هەزار دۆلارە و ئێستا لەم بازاڕە یەکێکە لە تەسبیحە هەرە گرانەکان".
بۆ دروستکردنی هەر تەسبیحێک سەرەتا ماددەکان لە شێوەی قالب هاوردە دەکرێن و دواتر لە رێگای ئامێری مشارەوە دەست دەکرێت بە بڕینی قالبەکان، پاشان چوارگۆشەی بچووک بچووکی لێ دەردەچێت، ئینجا لە رێگای ئامێرێکی دیکەوە دەست دەکرێت بە داتاشینی قەبارەی بازنەیی و ئینجا کونکردنی دەنکەکە، دواتر لە رێگای ئامێرێکەوە کە تایبەتە بە درەوشانەوە، دەنکە تەسبیحەکە بە دوو قۆناغ تێپەڕ دەبێت، یەکێکیان قۆناغی نەھێشتنی شوخت و کونی بچووکە و ئەوەی دیکەش قۆناغی کۆتایی دەنکەکەیە کە بریتییە لە درەوشانەوە و بریقەدارکردنی دەنکەکان، ئینجا لە رێگای دەزوویەکەوە دەنکەکان بەیەکەوە دەبەستێتەوە و دەبێتە تەسبیح.
ئەم تەسبیحەش بۆ مەبەستی جۆراوجۆر بەکاردێت وەکو زیکرکردن و یادکردنەوەی خودا و زۆرجاریش تەسبیح بۆ خۆخافڵاندن بەکاردێت و لە کۆڕ و دیوەخانەکاندا بەدەست پیاوە بە تەمەنەکانەوە دەبینرێت.
